Gjykata Themelore në Prizren, përmes një komunikate për media ka njoftuar se e ka aprovuar kërkesën e Prokurorisë Themelore në Prizren, për caktimin e masës së paraburgimit ndaj të dyshuarit R.C., raporton Drejtësia Sot. R.C.,dyshohet se ka kryer vepër penale “Dhënie Ryshfeti”, ashtu që me datë 12.12.2021, në orët e mbrëmjes në pikën kufitare në Vërmicë, me t’u afruar te sporteli i kontrollit policor, pasi ia dorëzon dokumentet zyrtarit policor, në lejen e qarkullimit të automjetit e kishte future një kartëmonedhë prej 50 € (pesëdhjetë euro).
Tutje në komunikatë thuhet se, i njëjti i drejtohet zyrtarit policor me fjalët ‘’këto të holla i kam lënë për ju për respekt tuajin pasi që nuk kemi certifikatë të vaksinimit, dhe as testin PCR për Covid-19, nëse do të keni mundësi të na lejoni hyrjen.
Andaj, gjyqtari i procedurës paraprake Skender Çoçaj, ka vlerësuar se me qëndrimin në liri i pandehuri mund të fshihet apo të jepet në arrati me qëllim të shmangies nga organet e ndjekjes dhe përgjegjësia penale, pasi që nuk ka vendbanim në Republikën e Kosovës, prandaj nëse i njëjti lihet në liri mundë të pamundësojë zhvillimin normal të procedurës penale.
Andaj Gjykata ka ardhur në përfundim se caktimi i paraburgimit në këtë fazë duke u mbështetur në rrethanat e lartcekura është më i domosdoshëm dhe i shërben efikasitetit të procedurës penale. Kështu ndaj të njëjtit Gjykata në Prizren, ka caktuar masën e paraburgimit në kohëzgjatje prej 1 muaj.