Autoriteti Pyjor Komunal dhe Drejtoria e Emergjencave të Prizrenit kanë drejtuar thirrje për mbrojtjen e pyjeve nga zjarret. Me këtë rast kanë bërë të ditur se ndezja e zjarreve jashtë vendbanimeve është e ndaluar.
“U apelojmë të gjithë qytetarëve të Komunës të Prizrenit, posaçërisht vizitorëve, banorëve të zonave rurale, shfrytëzuesve të pronave dhe qytetarëve, që të kenë kujdes maksimal në parandalimin e paraqitjes së zjarreve dhe përhapjes së tyre në pyje”, thuhet në këtë apel, shkruan sot “Koha Ditore”.
Sipas tyre për personat që shkaktojnë zjarre parashihen dispozita ndëshkuese sipas ligjit.
“Ju bëjmë me dije po ashtu se bazuar në Ligjin për pyjet e Kosovës ‘ndalohet ndezja e zjarrit jashtë vendbanimeve dhe në raste të ndezjes së zjarreve personat përgjegjës do të sanksionohen’”, shkruan në apel.
Autoriteti Pyjor Komunal dhe Drejtoria e Emergjencave të Prizrenit kanë kërkuar nga qytetarët që në rast se vërejnë ndonjë ndezje eventuale të zjarrit në pyjet e Prizrenit t’i lajmërojnë zyrtarët e Autoriteti Pyjor Komunal.
Shpërthimi i zjarreve në zonat fushore dhe pyjore të rajonit të Prizrenit vitin e kaluar pat mobilizuar drejtuesit e institucioneve të zbatimit të ligjit dhe të emergjencave për koordinimin e veprimeve me qëllim të parandalimit të rasteve të tilla…