Të martën, policia në Prizren, ka bërë prezantimin e aplikacionit digjital “Lajmëro policinë”, përmes të cilit qytetarët mund të informojnë policinë për të gjitha veprat penale.
Gjatë prezantimit të këtij aplikacioni, zëdhënësi i DRP në Prizren, Shaban Osmanollaj, tha se përmes aplikacionit “Lajmëro policinë”, qytetarët mund të informojnë policinë për të gjitha veprat penale që janë në kundërshtim me ligjin dhe bashkëngjitur me informacionin mund të dërgojnë edhe fotografi.
Duke pasur parasysh faktin se teknologjia ka arritur një avancim shumë të lartë, edhe ne duhet të ndjekim këto zhvillime, theksoi zëdhënësi Osmanollaj. Ai demonstroi edhe se si mund të përdorin qytetarët këtë aplikacion i cili është në tre gjuhë, pasi ta kenë instaluar atë në telefonat mobil.
Zëdhënësi Osmanollaj, tha gjithashtu se, aplikacioni “Lajmëro policinë” është program i raportimit digjital që ofron më shumë siguri për qytetarët e Kosovës, dhe se informacioni dërgohet direkt te njësia e specializuar që merret me rastet. Ndryshe, sipas zëdhënësit Osmanollaj, Policia e Kosovës në bashkëpunim me OSBE-në, ka filluar me aplikacionin që instalohet më telefona mobil qysh nga qershori i këtij viti, dhe ky prezantim i dedikohet promovimit të mëtejmë të këtij aplikacioni./TV Prizreni/