Gjykata Themelore Prizren aprovoi kërkesën e prokurorisë Themelore Prizren, dhe i caktoi masën e paraburgimit shtetasit nga Shqipëria, në kohëzgjatje prej 30 ditësh, nën dyshimin për narkotikë në sasinë prej 1kg e 495 gr.
Në njoftimin e saj zëdhënësja e Gjykatës Themelore Prizren, Afërdita Kicaj, njofton se ” ndaj të pandehurit me iniciale L.M. nga fshati Bele, Komuna e Kukësit, Republika e Shqipërisë, u caktua paraburgimi për shkak të dyshimit të bazuar se ka kryer veprën penale blerja, posedimi, shpërndarja ose shitja e paautorizuar e narkotikëve, substancave psikotrope dhe analoge, Masa e paraburgimit do të llogaritet prej datës 19.11.2018 e cila do të zgjasë deri me datën 18.12.201”.
Sipas dyshimeve fillestare të Prokurorisë Themelore Prizren i pandehuri me iniciale L.M, gjatë tentimit të kalimit të kufirit Shqipëri – Kosovë në këmbë në posedim të pandehurit janë gjetur substanca narkotike që dyshohet të jetë e llojit “marihuanë”, dhe atë një qese najloni me peshë prej 1.kg e 495 gr, të paketuara për shitje.
Më tutje sipas njoftimit sqarohet se duke pasur parasysh peshën e veprës penale e cila në rastin konkret është e rëndë, pasi që i pandehuri dyshohet se ka kryer veprime kundërligjore duke vepruar në dëm të vlerave të shoqërisë ku mbrohet jeta e njerëzve shëndeti i popullsisë e veçanërisht i të rinjve, kjo vepër penale është mjaft e shprehur dhe pasojat e saj ndjehen çdo ditë e më shumë në popullatën vendore në Kosovë, rritet numri i personave që shfrytëzojnë mjetet narkotike.
Andaj është konstatim i gjykatës se caktimi i paraburgimit ndaj të njëjtit është i bazuar dhe i arsyeshëm për sigurimin e prezencës dhe zhvillimin normal të rrjedhës së procedurës penale, njofton zëdhënësja e Gjykatën Themelore Prizren.