Të hënën, në Gjykatën Themelore në Gjakovë, dega Rahovec, është mbajtur seanca e shqyrtimit kryesor ndërmjet paditësit, Skender Hundozi dhe të paditurit, Burrim Hundozi, për kompensimin e dëmit material, vlera e të cilës arrin shumën 1,150 euro.
Përfaqësuesi i paditësit, avokati Gazmend Sharku ka kërkuar që seanca të mbahet pa praninë e të paditurit, pasi që sipas tij, i njëjti ka qenë i njoftuar nga seanca e kaluar dhe në seancën e sotme nuk ka prezantuar.
Gjykatësi Betim Behluli e ka aprovuar kërkesën e përfaqësuesit të paditurit, duke shtuar se paditësi ka qenë i njoftuar nga seanca e kaluar e datës 5 mars 2020, mirëpo i njëjti mungon dhe mungesën nuk e ka arsyetuar.
Më pas avokati Sharku i propozoi gjykatës që kërkesëpadinë e paditësit ta aprovoj në tërësi si të bazuar dhe ta obligoj të paditurin, Burrim Hundozi, që t’i kompensojë edhe shpenzimet e procedurës.
“Mbes në tërësi pranë padisë dhe kërkesëpadisë dhe deklarata nga seanca e kaluar, duke theksuar faktin se nga provat e prezantuara që gjenden në shkresat e lëndës, rezulton se i padituri në mënyrë të kundërligjshme e dëmton paditësin në gjësende në vlerë prej 1,150 euro”, tha avokati Sharku.
Sipas përfaqësuesit të paditësit, kjo vërtetohet me vendimin e Gjykatës Themelore në Gjakovë dega në Rahovec, të 24 dhjetorit 2018, i plotfuqishëm me 28 mars 2019.
Ndryshe, më 4 prill 2019, Skender Hundozi ka ushtruar padi kundër Burrim Hundozit, për kompensimin e dëmit material.
Sipas padisë, paditësi Skender Hundozi është pronar i lokalit “Randevu”, në të cilin lokal i padituri Burrim Hundozi, me 19 prill 2012, rreth orës 23:30 minuta, ka vjedhur aparatin e cigareve (40 paku cigare të llojeve Marlboro, Kent, LuckyStrike dhe Vinston), një portofol me 3 euro para të gatshme dhe 10 euro apoena metalike.
Sipas padisë, ky pretendim vërtetohet me aktgjykimin dënues të Gjykatës Themelore në Gjakovë, dega në Rahovec. /BetimipërDrejtësi