“Rabbitland” (Toka e lepujve), që është pjesë e garës për filmin më të mirë të shkurtër dokumentar, është shfaqur në ekranin e “DokuKino Pllato” duke shpërndarë mesazhin e protestës kundër pushtetit. Animacioni i regjisorëve nga Serbia, Nikola Majdak dhe Ana Nedelkoviq, është shoqëruar edhe me një punëtori.
Janë lepuj, por pak ngjasojnë me lepujt e vërtetë. Janë ngjyrë roze, veshët nuk u qëndrojnë përpjetë e sytë i kanë të bardhë e të mëdhenj. Në majë të kokës kanë nga një gropë në vend të trurit.
Edhe shtëpitë e tyre janë rozë, por duken si të ishin të djegura. Ato janë pa kulme e të dëmtuara. E në qendër të qytetit me ngjyrë ari kanë marrë formë këmbët e një femre. Për lepujt kjo është botë e përkryer.
I gëzohen çdo ndryshimi që ndodh në vendin e tyre dhe shumë lehtë përshtaten me të. Ani pse ndryshimet janë të pakta, ata janë të përmbushur me jetën e tyre të përditshme, që e kalojnë çdo ditë duke votuar. E këto zgjedhje zënë vend çdo ditë në “Rabbitland” (Tokën e lepujve). /Koha Ditore/