Me rastin e 30 vjetorit të rënies së dëshmorit të kombit, Dr. Halil Berisha, sot nën patronatin e kryetarit të Komunës, Mytaher Haskuka, në Shtëpinë e Kulturës “Xhemajli Berisha” u organizua një akademi përkujtimore.
Në një fjalë rasti, kryetari Haskuka theksoi kontributin e jashtëzakonshëm të Dr. Halil Berisha, në zhvillimin e mjekësisë, dhe vuri në dukje se ai ishte një profesionist i virtytshëm, i cili nuk u përkul kundër trysnive dhe presioneve të organeve të UDB-së jugosllave dhe nuk dha diagnoza të rrejshme për vdekjen e dëshmorëve të vrarë nga okupatori serb, të cilët dëshironin t’i paraqesnin ato si vetëvrasje.
“Mirëpo këtë qëndrim të drejtë, të dinjitetshëm dhe guximtar, të cilin e mbajti edhe në rastin e vrasjes së Xhemajli Berishës, për fat të keq Dr. Halil Berisha e pagoi me çmimin më të shtrenjtë, atë të jetës”, deklaroi Haskuka, i cili më tej njoftoi se me vendimin e marrë në asamblenë komunale, gjatë festave të qershorit Dr. Halil Berishës do t’iu ndahet titulli “Nderi i Qytetit”.
Përveç kryetarit Haskuka, në këtë akademi fjalën e morën edhe ambasadori i Republikës së Shqipërisë në Kosovë Qemal Minxhozi, kryesuesi i Kuvendit të Komunës së Prizrenit Artan Abrashi, veprimtarë të çështjes kombëtare, kolegët dhe të afërmit e Dr. Berishës, ndërkaq të pranishëm ishin edhe deputetë të Kuvendit të Kosovës, asamblistët e Kuvendit dhe drejtorët komunalë të Prizrenit, përfaqësuesit e Policisë së Kosovës si dhe përfaqësuesit e shoqatave dhe qytetarët e Prizrenit.