Drejtori i Qendrës Kryesore të Mjekësisë Familjare (QKMF) në Prizren, Dr. Fadil Bajraktari, u ka bërë thirrje të gjithë qytetarëve që ende nuk e kanë përzgjedhur mjekun e tyre familjar, që ta bëjnë këtë sa më parë.
„Përzgjedhja e mjekut familjar mundëson kujdes të vazhdueshëm, të personalizuar dhe më efikas për shëndetin tuaj“, u shpreh Dr. Bajraktari.
Kjo thirrje u bë në kuadër të aktivitetit të organizuar nga QKMF-ja në Prizren me rastin e Ditës Ndërkombëtare të Mjekut Familjar, që u shënua më 19 maj. Aktiviteti kishte për qëllim të rrisë ndërgjegjësimin e qytetarëve për rëndësinë e mjekut familjar si pika e parë dhe më e rëndësishme e kontaktit me sistemin shëndetësor për çdo individ dhe familje.
Përmes këtij aktiviteti, QKMF-ja synon të forcojë lidhjen ndërmjet qytetarëve dhe shërbimeve të mjekësisë familjare, duke theksuar rolin parësor të këtyre mjekëve në ofrimin e kujdesit shëndetësor bazë dhe në parandalimin e sëmundjeve./PP/
