Qendra Rajonale për Trashëgimi Kulturore(QRTK) në Prizren, thotë se Komuna në këtë qytet, po tenton t’i përvetësojë projektet e saj.
Sipas QRTK-së, deri më tash nuk është njoftuar nga Komuna e Prizrenit për ndonjë plan konkret.
“Shihet qartë tendenca e Komunës së Prizrenit për të përvetësuar projektet e QRTK-së”, thuhet në komunikatën e këtij institucioni.
“QRTK nuk është e njoftuar se Komuna e Prizrenit ka ndonjë plan konkret për mbrojtjen dhe mirëmbajtjen e monumenteve të kulturës, përveç “planeve për eliminimin e rrezikut që kanosen nga objektet e vjetra” e cila është pasojë e mosveprimit të tyre”.
“Për të paraqitur si sukses të saj, Komuna e Prizrenit paraqet punët e realizuara nga QRTK . Pra, mospunën e vet është duke u munduar ta kamuflojë me sukseset e QRTK në Prizren”.
“QRTK është ndër institucionet më të rëndësishme në fushën e mbrojtjes së trashëgimisë kulturore”.
“QRTK është institucion vartës i MKRS-së, që në kuadër të fushëveprimit të vet, identifikon, dokumenton, planifikon, koordinon, zbaton dhe promovon plane dhe aktivitete në fushën e trashëgimisë kulturore në Rajonin e Prizrenit”.
“Ndër të tjera Qendra Rajonale për Trashëgimi Kulturore në Prizren në kuadër të planprogramit sistematikisht ka bërë ndërhyrje restauruese në objektet e trashëgimisë kulturore, vetëm në vitet 2017-2018 janë mbi 30 projekte restauruese”.
“ Përpilimi i Planit të Menaxhimit të Qendrës Historike të Prizrenit është iniciuar dhe është duke u përpiluar (punuar) me financimin e Ministrisë së Kulturës, Rinisë dhe Sportit (MKRS), implementues i projektit është RROK–u (Rrjeti i Organizatave Kulturore) Prizren, kurse QRTK-ja me profesionistët e saj, është bashkëpunëtore lokale për hartimin e Planit të Menaxhimit”.
“Revitalizimi dhe integrimi socio-ekonomik i komunitetit lokal në rrugën “Marin Barleti” (Revitalizimi i rrugës “Marin Barleti”) është projekt i Ministrisë së Kulturës, Rinisë dhe Sportit (MKRS), Bashkimit Evropian – Zyra në Kosovë dhe Ambasadës së Mbretërisë së Bashkuar – Kosovë; implementuesit e projektit janë Qendra Rajonale për Trashëgiminë Kulturore (QRTK) – Prizren dhe Organizata Jo-Qeveritare Ec Ma Ndrysh, kurse partner i projektit është dhe Komuna e Prizrenit”./PrizrenPress.com/