Kandidati i LDK-së për kryetar të Prizrenit, Anton Quni, premton se do të zgjidh problemin e gropës te Sheshi i Lidhjes, i cili që disa vite është hapur për gërmime arkeologjike.
Sipas tij, kjo gropë po e rrezikon jetën e njerëzve.
“Vitet po kalojnë e kjo gropë që është hapur për gërmime arkeologjike, në mes të qytetit, po vazhdon me qenë e hapur duke rrezikuar jetën e kalimtarëve e sidomos të fëmijëve”, tha Quni.
Ai nuk pajtohet me arsyetimin e pushtetarëve.
“Arsyetimin se kjo bie në domenin e pushtetit qendror, që zyrtarët komunal e kanë dhënë, sa herë asamblistët tanë e kanë ngritur si shqetësim, nuk qëndron, sepse një qeveri e përgjegjshme lokale do të kishte gjetur mundësi alternative për t’i bërë një mbyllje të përkohshme, me material që mundëson hapjen e lehtë sa herë do të duhej vazhduar punimet”.
“Një pamje e tillë ka shëmtuar zonën më të frekuentuar të qytetit duke dëmtuar në masë të madhe edhe turizmin”.
“Unë dhe ekipi im e kemi; idenë, planin dhe ekspertët më të mirë që do të përkujdeseshin për ti zgjidhur çështjet si kjo e të tjera infrastrukturore të hapësirave publike”./PrizrenPress.com/