Shtesat mujore prej 950 eurosh në pagat e menaxhmentit të Universitetit të Prishtinës janë bërë objekt kundërthënës në mes Këshillit Drejtues dhe Rektoratit, shkruan sot “Koha Ditore”.
Zëdhënësi i Rektoratit, Ardian Gola, ia ka konfirmuar gazetës se Këshilli Drejtues i Universitetit të Prishtinës ka dalë me propozimin që për postet e menaxhmentit të UP-së, përkatësisht rektorit dhe prorektorëve, të nisë të paguhen edhe shtesa prej 950 eurosh, të cilën, pos pagës e marrin vetëm anëtarët e Këshillit, e jo edhe stafi akademik.
Krejt ky diskutim po bëhet në kohën kur Universiteti i Prishtinës përballet me problemet që i ka trashëguar pas skandaleve që quan në dorëheqjen e menaxhmentit të kaluar.
Bazuar në të dhënat zyrtare që posedon gazeta, anëtarët e Këshillit Drejtues të UP-së marrin pagën bazë mujore në vlerë prej afro 1.200 euro dhe, pos tyre, marrin edhe një “shtesë funksionale” prej 950 eurosh. E njëjta “shtesë” aktualisht nuk jepet edhe për postin e rektorit dhe prorektorëve/Koha Ditore/