Ministria e Ambientit ka rinisur sot aksionin e rrënimit të objekteve pa leje në Parkun Nacional të Prevallës. Aty është rrënuar edhe villa e Sabit Gecit dhe pritet të rrënohen edhe villat e politikanëve të tjerë. Ministri i Ambientit, Dardan Gashi pari premtuar se askush nuk do kursehet nga aksioni i rrënimeve në parqet nacionale.Ministria e Ambientit dhe Planifikimit Hapësinor ka rinisur aksionin për të rrënuar të gjithë ndërtimet që kanë ndodhur në Parkun Nacional të Prevallës.
Kështu, sot, kjo Ministri ka rrënuar edhe villën e Sabit Gecit, ish-komandat i Zonës së Drenicës, në kohën e luftës.
Zyrtarë të Ministrisë kanë thënë se rrënimet do të vazhdojnë dhe nuk do të ndalen pa u pastruar në tërësi kjo zonë nga ndërtimet e egra.
“Rrënimet e villave do të vazhdojnë. Asnjë objekt pa leje, pa plan nuk do të kursehet”, ka thënë një zyrtar i Ministrisë së Ambientit,transmeton Express.
Kjo Ministri ka nisur aksionin e rrënimeve në Prevallë para disa kohësh. Ndërsa, sot, do të rrënohen ato objekte, të cilat janë paralajmëruar para një muaji se nëse nuk i rrënojnë vetë, atëherë këtë do ta bëjë Ministria e Ambientit.
Në Prevallë, shumica e politikanëve patën ndërtuar objekte në Prevallë, duke mos respektuar asnjë prej kritereve që kërkohen për ndërtime të tilla nëpër Parqe Nacionale.
Ministri i Ambientit, Dardan Gashi më herët pati premtuar se secili objekt i ndërtuar kundërligjshëm do të rrënohet.