Gati 80 vajza janë helmuar dhe janë hospitalizuar në dy sulme të veçanta në shkollat e tyre fillore në veri të Afganistanit, ka deklaruar të dielën një zyrtar lokal i arsimit.
Sipas tij personi që orkestroi helmimin kishte një inat personal, por nuk dha më shumë detaje. Sulmet ndodhën në rajonin Sar-e-Pul të shtunën dhe të dielën.
Mendohet të jetë hera e parë që ndodh ky lloj sulmi që kur talebanët erdhën në pushtet në gusht të vitit 2021 dhe filluan represionin e tyre ndaj të drejtave dhe lirive të grave dhe vajzave afgane.
Në Afganistan vajzave u ndalohet arsimimi përtej klasës së gjashtë, përfshirë edhe universitetin, dhe grave u ndalohet nga shumica e vendeve të punës dhe hapësirave publike.
Helmimet ndodhën në rrethin Sangcharak, ka deklaruar Mohammad Rahmani, i cili udhëheqë departamentin e arsimit provincial. Ai tha se 60 nxënës u helmuan në shkollën Nasëan-e-Kabod Aab dhe 17 të tjerë u helmuan në shkollën Nasëan-e-Faizabad.
“Të dyja shkollat fillore janë afër njëra-tjetrës dhe janë shënjestruar njëra pas tjetrës”, deklaroi ai për Associated Press. “Ne i zhvendosëm studentët në spital dhe tani ata janë të gjithë mirë.”
Hetimi i departamentit është në vazhdim dhe hetimet fillestare tregojnë se dikush me inat ka paguar një palë të tretë për t’i kryer sulmet, tha Rahmani.
Hetimi nuk jep asnjë informacion se si u helmuan vajzat apo natyrën e plagëve të tyre. Sipas Rrahmani, vajzat ishin në klasën e parë deri në gjashtë.
Irani fqinj është tronditur nga një valë helmimesh, kryesisht në shkollat e vajzave, që datojnë që nga nëntori i vitit të kaluar. Mijëra studentë thanë se ishin të sëmurë nga tymrat e dëmshëm në incidente. Por nuk ka pasur asnjë fjalë se kush mund të qëndrojë pas incidenteve apo çfarë nëse ka, janë përdorur kimikate./The Guardian