Mbrëmë ka rënë perdja e edicionit të 26-të të festivalit tradicional folklorik “Hasi Jehon”. Ky festival që mbahet çdo vit në fillim të muajit maj dhe zgjat për tre ditë rresht, në “Kodrën e pajtimit”. Përveç shoqërive kulturo-artistike dhe mysafirëve pjesëmarrës, sërish ka tubuar me qindra shikues gjatë 3 netëve.
Në mbrëmjen finale, juria profesionale e pati të vështirë për të përzgjedhur më të mirët në këtë eveniment kulturor me pjesëmarrje të trupave artistike nga shumë vise mbarë shqiptare.
Sipas jurisë së festivalit, fitues i këtij edicioni është shpallur ansambli “Rugova” nga Peja, në vendin e dytë është radhitur SHKA “Bresana” nga Bresana e Opojës, ndërsa në vendin e tretë është përzgjedhur SHKA “Katarina Josipi” nga Zymi i Hasit.
“Edhe këtë vit kemi qenë të fokusuar që festivali të jetë i përqendruar në ruajtjen e traditës dhe kulturës sonë, dhe jemi angazhuar maksimalisht duke bërë përpjekje që këto vlera të barten te brezat e rinj”, theksoi drejtori i festivalit, Haziz Hodaj.
Ndërkaq, kryetari i jurisë profesionale, etnologu Ukë Xhema, tha se ky festival edhe një herë dëshmoi se trupa të ndryshme artistike përmes paraqitjeve në skenë me mjaft dinjitet po i ruajnë dhe kultivojnë vlerat shpirtërore, kulturore e tradicionale të trashëgimisë sonë të pasur kulturore.
Valltarja më e mirë e festivalit është përzgjedhur, Fazile Greiçevci, nga SHKA “Xhavit Haziri” nga Obiliqi. Ajo tha se ndjehet e lumtur për çmimin e fituar, dhe shtoi se e gëzon fakti që shumë të rinj me mjaft sukses po e ruajnë traditën dhe kulturën përmes pjesëmarrjes në shoqëri kulturo-artistike.
Gjithashtu në këtë festival, me mirënjohje dhe shpërblime janë nderuar edhe pjesëmarrës të tjerë, si dhe janë ndarë edhe çmimet “Jehona e Hasit” për personalitete që e mbajtën gjallë për dekada me radhë këtë Festival si: Hasan Feka, Frrok Kristaj dhe Muhamet Lushaj. /Tv Prizreni/