Agjenti i futbollistit 25 vjeçar ka kërcënuar se, nëse kjo çështje nuk zgjidhet, atëherë Mo Salah edhe mund ta bojkotojë Kupën e Botës dhe të mos marrë fare pjesë me Egjiptin.
Problematika sipas agjentit dhe avokatit të Salah është se, ai veçse ka marrëveshje sponsorizimi me kompaninë Vodafone, kurse kombëtarja e Egjiptit sponsorizohet me rivalët e tyre, WE.
“Ata (Federata e Egjiptit) nuk kanë të drejtë ta përdorin imazhin e Salah pa ndonjë marrëveshje apo pajtim me shkrim nga ai që i ka të drejtat për imazhin e Salah, e që është vet ai”, ka deklaruar agjenti, Ramy Abbas.
Megjithatë, Federata e Egjiptit në futboll, deri në këtë moment ka refuzuar ta largojë imazhin e Salah nga aeroplani zyrtar i skuadrës dhe kjo mënyrë e neglizhencës së tyre, e ka nervozuar tej mase Salahn, i cili përmes disa mesazheve në Twitter deklaroi:
“Për fat të keq mënyra se si kanë vendosur ata ta zgjedhin këtë çështje, është një fyerje e madhe kundrejt meje. Kisha shpresuar se zgjidhja dhe përgjigja, do të ishte më elegante nga ana e tyre”.
“Por, deri më tani as që jemi kontaktuar nga Federata që të gjejmë ndonjë zgjidhje, e në ndërkohë imazhi im po përdoret gjithandej pa autorizimin tim. Nuk e di çfarë ndikimi janë duke menduar ata që kjo gjë është duke pasur. Pozitiv nuk e besoj”, ishin fjalët e Mohamed Salah.
Deri më tani tifozët e Egjiptit janë duke qëndruar neutral, megjithatë përfaqësuesit e Salah mendojnë se kjo është një çështje serioze dhe të gjitha opsionet janë të mundshme, e madje edhe ai që 25 vjeçari të tërhiqet nga Kupa e Botës me Egjiptin. /Insporti.com