Sindikata e Bashkuar për Arsim, Shkencë dhe Kulturë bëri thirrje që të mos zbatohet një udhëzim administrativ i Minsitrisë së Arsimit për shpalljen e konkurseve për mësimdhënësit që nuk kanë të përfunduar masterin.
Ata këtë kërkesë e arsyetuan me faktin se sipas tyre, këtyre mësimdhënësve nuk i është dhënë mundësia që të bëjnë avancim akademik pa shkëputje nga puna.
“SBAShK-u konsideron se anëtarët tonë , të punësuar në arsimin e mesëm të lartë nuk janë fajtor pse nuk u është dhënë mundësia e as hapësira për të vazhduar me ngritjen profesionale pa shkëputje nga puna e për të arritur titullin master dhe prandaj pa ua krijuar në mënyrë institucionale këtë mundësi, si u veprua me kolegët tanë që kishin Shkollën e Lartë Pedagogjike, nuk mund as të mendohet nga dikush që atyre t’u vihen në pikëpyetje vendet e punës, në të cilat janë me vite e dekada.”, thuhet në njoftimin e SBAShK.
SBAShK tregoi se pas përgatitjeve të duhura në Fakultetet e edukimit ishin dërguar në ngritje profesionale të gjithë të punësuarit në arsimin e mesëm të ulët, që nuk kishin kaluar moshën 50 vjeç e që ihsin me Shkollën e Lartë Pedagogjike. Ky aktivitet i ngritjes profesionale pa shkëputje nga puna është në përfundim e sipër.
Ndërsa sipas tyre nga ana tjetër MASHT , gjegjësisht ministri i atëhershëm , prof. rr. Arsim Bajrami kishte nxjerr Udhëzimin Administrativ 06/2015 që ka të bëj me Normativin mbi Kuadrin Profesional të Arsimit të Përgjithshëm, neni 12 i të cilit thotë se : “se pas përfundimit të vitit shkollor 2017-2018 shpallet konkursi për vende të lira pune për të gjithë kandidatët që nuk i plotësojnë kriteret e kualifikimit si më lartë”, që nënkupton se deri në këtë kohë të gjithë të punësuarit në arsimin e mesëm duhet të kenë titullin master.
Sipas SBASHK ky udhëzim administrativ nuk ishte menduar mirë për sa i përket afatit kohor ndërsa kërkuan që ministri aktual, Shyqyri Bytyqi të veprojë dhe shtyjë afatin që e ka përcaktuar ish Ministri Bajrami dhe të obligohet Fakulteti i Edukimit që të krijojë hapësirë e të caktojë kuadro adekuate që do të punonin me të gjithë mësimdhënësit e arsimit të mesëm, që nuk janë më të vjetër se 50 vjeç në mënyrë që të gjithë të kenë mundësi për ngritje të duhur profesionale.