Familjarë të dëshmorëve, invalid e veteran të UÇK-së, qytetarë, nxënës të shkollave të Prizrenit dhe zyrtarë të lartë komunal, u mblodhën të enjten në varrezat e dëshmorëve në Landovicë, për të përkujtuar të rënët për lirinë e Kosovës me rastin e shënimit të ditës së dëshmorëve të komunës së Prizrenit.
Kryetari i Prizrenit, Ramadan Muja, tha se dëshmorët janë më meritoret që sot ne frymojmë lirshëm, dhe vepra e tyre duhet të jetë udhërrëfyes i një të ardhme më të ndritur të vendit.
Ndërkaq, eprori i FSK-së, kapiten Sejdi Krasniqi, tha se dëshmorët janë ata që i japin kuptim angazhimeve të të gjithë neve për të jetësuar amanetin e tyre, për një vend të përparuar në shërbim të qytetarëve.
Ish eprori i lartë i UÇK-së, Nehat Basha, tha se lufta heroike dhe rënia në altarin e lirisë të shumë bashkëluftëtarëve duhet të respektohet në shkallën më të lartë të mundshme, dhe shtoi se edhe edhe ushtarët që mbeten të gjallë duhet t’i gëzojnë të drejtat e tyre nga shteti, dhe sa më parë që është e mundur të intervenohet në pastrimin e listave për statusin e veteranit.
Pas Landovicës, janë vendosur buqeta me lule edhe në shtatoren e dëshmorit, Ismajl Kryeziu në Arbanë, Monumentin e Lirisë, shtatoret e dëshmorëve Ismet Jashari – Kumanova e Pal Paluca dhe Heroit të Kosovës, Xhevat Berisha në Shatërvan. /TV Prizreni/