Policia e Kosovës (PK), të dielën, ka arrestuar një person nga fshati Nëpërbisht të Komunës së Suharekës, si të dyshuar për moszbatim të vendimit te Qeverisë së Kosovës për mbrojtje nga koronavirusi.
Sipas raportit 24 orësh të PK-së, personi i arrestuar ka shfrytëzuar rrugët alternative për të shitur disa fidanë në fshatin Piranë të Komunës së Prizrenit.
Pas intervistimit, me vendim të prokurorit, ai është liruar në procedurë të rregullt.
Ndryshe, nga 11 prilli edhe Suhareka është shpallur zonë karantinë nga Ministria e shëndetësisë e Republikës së Kosovës.
I kontaktuar nga “Betimi për Drejtësi”, komandanti i Stacionit Policor të Suharekës, Afrim Sylaj ka thënë se janë marrë të gjitha masat e duhura duke vënë pika statike në hyrjet-daljet e Komunës së Suharekës, të cilat e kufizojnë lëvizjet me komunat e tjera..
I njëjti ka thënë se deri më tani parregullsitë dhe arrestimet më së shumti ndodhin gjatë “orës policore”.