Projekti i cili nisi në vitin 2008-të rrezikon të mbyllet gjatë kësaj vere. Shkolla e Rokut në qytetin e Mitrovicës, pas shtatë viteve funksionim me rreth 800 të rinj të etniteteve të ndryshme që jetojnë në Kosovë, rrezikon të mbyllet shkaku i mungesës së fondeve.
Qëllimi i Shkollës ndër vite ka qenë bashkimi i të rinjve të talentuar për muzikë sidomos në një ambient si Mitrovica, një vend kontraverz për shkak të bashkëjetesës së shqiptarëve dhe serbëve në dy anët e qytetit të ndarë.
“Pikërisht në këtë kohë kur ka shumë të rinj që duan të jenë pjesë e jona, jemi në një situatë paradoksale kur nuk kemi fonde dhe na duhet ta mbyllim shkollën. Fondet nuk na lejojnë të vazhdojmë. Është e dukshme që tani ka çështje më të rëndësishme dhe konflikte të tjera të cilat bëjnë që donatorët të largohen nga Kosova” shkruhet në webfaqen e kësaj shkolleje.
Megjithatë, tanimë është lansuar një kampanjë për të ruajtur shkollën nga mbyllja e saj.
Deri tani, figurojnë rreth 2768 euro të mbledhura nga donacionet online. /KultPlus.com/