Ka dështuar të mbahet gjykimi, i paraparë për të martën, në Gjykatën Themelore në Prizren, ndaj zyrtarëve policorë, Flurim Tafolli dhe Rexhep Krasniqi, të akuzuar për keqpërdorim të detyrës zyrtare.
Tafolli dhe Krasniqi, akuzohen se e kanë liruar një veturë të vetaksidentuar, megjithëse ajo ka rezultuar e pazhdoganuar.
Shkak i dështimit të mbajtjes së seancës, ka qenë mungesa e tre dëshmitarëve Fisnik e Flamur Kuqi dhe Xhevat Kabashaj, të cilët pritej të jepnin dëshminë e tyre, lidhur me rastin konkret.
Lidhur me mungesën e tyre gjykatësja Ajser Skenderi, tha se për dëshmitarin Kabashaj, gjykata ka prova se i njëjti sipas fletdërgesës ka rezultuar si person i panjohur, ndërsa për Flamur Kuqin, gjykata ka thënë se nuk ka prova se ai është thirrur në mënyrë të rregullt, si dhe për Fisnik Kuqin, sipas fletkthesës është konstatuar se ai është shpërngulur nga vendbanimi i tij.
Seanca e radhës për këtë rast, është caktuar të mbahet më 18 janar 2019, në ora 10:00.
Ndryshe, ky rast zhvillohet në bazë të aktakuzës së Prokurorisë Themelore në Prizren, e ngritur më 26 shkurt 2018, me të cilën të pandehurit akuzohen se duke vepruar në cilësinë e zyrtarëve policorë, kanë liruar një veturë të vetaksidentuar, megjithëse e njëjta ka rezultuar e pazhdoganuar.
Sipas aktakuzës, në automjetin e liruar nga të pandehurit kanë qenë të vendosura tabelat e regjistrimit të një automjeti tjetër, andaj sipas organit të akuzës, ata është dashur ta dërgojnë automjetin në terminal doganor, e jo ta lirojnë. /BetimipërDrejtësi