Kryetari i Nismës për Kosovë në Prizren, Sinan Aliaj, i ka bërë thirrje kryetarit të Komunës, Ramadan Muja, që në vitin e ardhshëm, vullnetarisht të shkojë në shtëpi.
Ai tha se qyteti i Prizrenit nuk mund të qeveriset nga një kryetar i dënuar dhe i moshuar.
“Prizreni nuk e meriton që të udhëhiqet nga një kryetar, që është dënuar nga gjykata”, ka thënë Aliaj për TVPZ, transmeton PrizrenPress.
Aliaj tha se kryetari Muja bashkë me drejtorët tij, duhet t’i thërrasin mendjes së tyre dhe të binden se kanë bërë shumë gabime gjatë qeverisjes së tyre.
“Ata ndoshta kanë pasur vullnet të mirë për të punuar, por ja që nuk kanë ditur dhe kanë bërë shumë gabime, prandaj edhe duhet të shkojnë në shtëpi”.
Ai ka kritikuar edhe partitë opozitare, të cilat pas dënimit të Ramadan Mujës dhe drejtorëve të tij, kanë pranuar të shkojnë në institucionet e Komunës.
“Nisma nuk është në Kuvend. Por, sikur të ishte nuk do të kishte pranuar që të shkoja në një institucion që drejtohet nga një kryetar i dënuar”.
Sinan Aliaj ka folur edhe për zgjerimin e Nismës në Prizren. Ai tha se Nisma në Prizren, po zgjerohet ngadalë,por me hapa të sigurt.
“Jemi duke u zgjeruar”.
“Nisma është e gatshme sikur edhe nesër po të shkojmë në zgjedhje”./PrizrenPress.com/