Tre profesorë që kanë dhënë mësim në Universitetin Publik të Pejës “Haxhi Zeka”, që ishin larguar vitin e kaluar nga menaxhmenti i kërij universiteti, janë akomoduar nga rektori i Universitetit të Prizrenit, Ramë Vataj.
Bëhet fjalë për tre profesorët: Emrush Azizovic, Adem Zogiani dhe Duda Balje, të cilët ishin larguar pas rekomandimit të inspektoratit të Ministrisë së Arsimit, për faktin se këta nuk kishin diploma të nostrifikuara.
Kështu i kanë thënë Gazetës Blic burime brenda Ministrisë së Arsimit, Shkencës dhe Teknologjisë.
Sipas këtyre burimeve, të tre këta profesorë nuk ishin në rregull me diplomat e tyre, prandaj Inspektorati i kishte rekomanduar menaxhmentit të Universitetit “Haxhi Zeka”, që të mos i mbaj më në punë ata.
Menaxhmenti i këtij universiteti, e kishte respektuar këtë rekomandim të Inspektoratit, duke mos u vazhduar kontratat.
Gazeta Blic e ka kontaktuar rektorin e Universitetit të Pejës, Naser Mrasori, për të mësuar më shumë rreth këtij rasti, mirëpo ky i fundit nuk ka dashur që të prononcohet për këtë çështje.
Këta tre profesorë nga 1 tetori i vitit të kaluar, kohë edhe kur ka filluar viti i ri akademik janë angazhuar si mësimdhënës tek Universiteti i Prizrenit “Ukshin Hoti”, ndonëse inspektorati kishte kërkuar largimin e tyre.
Paradoksale është edhe raporti i Auditorit të Përgjithshëm, i cili duket se po përdor standarde të dyfishta.
Derisa në raportin e publikuar për Universitetin e Pejës, për vitin 2013 kishte dhënë vërejtje pikërisht për mbajtjen në punë të profesorëve pa diploma të nostrifikime, Auditori Gjeneral nuk e thotë asnjë fjalë për të njëjtën profesorë, që tani punojnë në Universitetin e Prizrenit “Ukshin Hoti”. / Gazeta Blic