Teksti i bustit të Skënderbeut në Londër është ndryshuar, tash për tash, nga persona të panjohur, raporton portali “Rrjeti i shqiptarëve të Britanisë”.
Bëhet fjalë për ndryshimin e emrit që në origjinal ishte “George Kastrioti – Skandarbeg”, i cili është shkruar në origjinal, pra në gjuhën shqipe “Gjergj Kastrioti – Skënderbeu”.
“Kjo fillimisht u kuptua kur imazhet e kësaj vepre ilegale u postuan në Facebook me 5 shkurt 2014. Fotot ishin të përcjellura me një tekst kinse të botuar në Interaktiv KTV, duke thënë ndër të tjera se “një grup shqiptarësh, që jetojnë në Britani të Madhe, me vetiniciativë kanë ndërruar pllakën e vendosur poshtë bustit të heroit kombëtar shqiptar Gjergj Kastriotit – Skënderbeut në Londër, në të cilën ishte shënuar gabimisht emri i tij”, raporton ky portal.
Rreth këtij ndryshimi ka reaguar ambasadori i Shqipërisë në Londër, Mal Berisha, i cili ka thënë se emri i Skënderbeut në gjuhën angleze nuk ka qenë gabim, ngase, në secilin vend ku ka bust heroi kombëtar emri i tij shkruhet në atë formë që të jetë i kuptueshëm për popullatën e atij vendi.
Projekti i vendosjes së bustit të Skenderbeut ka zgjatur me vite dhe pas shume mundimeve dhe negociatave u vendos në Bayswater të Londrës me 28 nëntor 2012, që ishte njëqindvjetori i shpalljes së pavarësisë së Shqipërisë.