Anëtari i AAK-së, Smajl Latifi i ka përmendur gjashtë arsye që sipas tij krijimi i qeverisë nga Ramush Haradinaj do të ndryshoi kontekstin e marrëdhënieve mes Kosovës dhe Serbisë.
“Së pari, pritet të ketë marrëdhënie shumë më të qarta duke e zbatuar parimin e reciprocitetit, ku Kosova nuk do të trajtohet edhe më tej si një kuazi-shtet dhe hambar ku gjithë të tjerët marrin nga pak prej saj.
Së dyti, Kosova nuk ka përse të bisedojë me Serbinë se si ta bëjë organizimin e vet të brendshëm politik dhe territorial.
Së treti, Kosova s’ka përse të bisedojë me Serbinë as për Veriun e as për serbët që jetojnë në Kosovë, sepse ata do të trajtohen në pajtim të plotë me ligjet tona në fuqi
Së katërti, Kosova do ta bëjë ushtrinë e vet dhe për këtë çështje nuk ka përse të pritet derisa të lejojë fqinji ynë, Serbia.
Së pesti, serbët e Kosovës duhet t’ua bëjnë të qartë përfaqësuesve të vet politik se kjo është Republika e Kosovës dhe ne jemi pjesë e saj.
Së gjashti, me Serbinë mund të bisedohet vetëm si të barabartë, si dy shtete të pavarura që e njohin njëri-tjetrin.
Meqë Kosova ka interes të madh për ridefinimin e marrëdhënieve me shtetin fqinj, Serbinë, në mënyrë që të mundësohet forcimi i pozitës së Kosovës dhe shqiptarëve në rajonin e trazuar, atëherë deputetët e zgjedhur duhet të mendojnë me kokë të ftohtë e ta votojnë Qeverinë Haradinaj, në mënyrë që të jetësohet më lehtë i vetmi kurs politik i qartë e i drejtë ndaj shtetit të Serbisë”, shkruan Latifi në Facebook.