Sot është dita e tretë e vazhdimësisë së aktiviteteve të larmishme edukativo – kulturore të Sculp’Edu III. Përmbyllja do të jetë pika kulminante artistike e gjithë edicionit – Performanca Artistike e shoqëruar nga tingujt e muzikës Jazz.
Performanca artistike e cila përmbyll këtë maratonë eventesh është e një lloji komplet të veçantë. E mbështetur në lajtmotivin e këtij edicioni, mjedisin, ajo do i sprovojë të ftuarit derisa të mbërrijnë në ambjentet e muzikës Jazz, transmeton KultPlus.
Me këtë rast, organizatorët e festivalit falënderojnë të gjithë artistët, sponsorët, mbështetësit, miqtë dhe publikun, pa përkrahjen e të cilëve këto arritje do të ishin të pamundura. Ky rrugëtim i përbashkët mundëson që të përgatitemi edhe më mirë për edicionet e ardhshme, që pritet të kulmojnë në vitin 2016 me Sculp’Biennalen e parë në Prizren.
Festivali ndërkombëtar i skuplturës Sculp Fest është i pari dhe i vetmi i tillë jo vetëm në Kosovë por edhe në tërë Ballkanin. Sculp Fest është emri gjeneral i projektit i cili ndahet ne tre departamente / festivale: Sculp’ice, Sculp’edu dhe Sculp’biennale. Përderisa dy të parat (Sculp’ice dhe Sculp’edu) zhvillohen çdo vit, Sculp’biennale do të mbahet çdo dy vite.