Këshilli Drejtues i Universitetit të Prishtinës “Hasan Prishtinës”, pritet që sot të vendos për postin e parë të këtij institucioni.
Pesë kandidatët që i kanë hyrë garës për rektorin e UP-së, janë Ramadan Zejnullahu, Behxhet Mustafa, Adem Nura, Anton Berishaj dhe Isuf Musliu.
Rektori që do të zgjidhet me këtë konkurs do të ketë mandat dyvjeçar për periudhën e mbetur të mandatit paraprak, përkatësisht deri më 30 shtator të vitit 2016.
Universiteti i Prishtinës deri në fillim të këtij viti u udhëheq nga Ibrahim Gashi, i cili dha dorëheqje, ndërsa që nga muaji prill Këshilli Drejtues pati zgjedhur profesor Anton Berishajn, si ushtrues detyre.
Rektorin e zgjedh Këshilli Drejtues nga lista e kandidatëve të propozuar nga komisioni prej pesë anëtarëve, të cilin komision e formon Senati.
Këshilli Drejtues ka të drejtë ta refuzojë listën e kandidatëve të propozuar nga komisioni duke e arsyetuar atë.
Rektori i UP-së zgjidhet me shumicën absolute (shumicën e anëtarëve të përgjithshëm) në pajtim me dispozitat e këtij Statuti.
Në rast se asnjë kandidat nuk fiton këtë shumicë në radhën e parë të votimit, atëherë dy kandidatët me numrin më të madh të votave kualifikohen në votimin e dytë.
Nëse asnjëri nga dy kandidatët nuk fiton shumicën absolute tri herë radhazi, procedura e zgjedhjes së rektorit përsëritet nga fillimi, siç është paraparë në Statutin e Universitetit të Prishtinës “Hasan Prishtina”.
Ndryshe, më 22 gusht është mbyllur edhe konkursi për zgjedhjen e rektorit të Universitetit të Prishtinës “Hasan Prishtinës”.