Dy persona janë vrarë mbrëmë në një kafene në komunën e Vevçanit në afërsi të Strugës.
Sipas informacioneve të policisë, autori i vrasjes së dyfishtë është identifikuar dhe bëhet fjalë për postierin Zdravko Srbakoski, i cili ka lënë të vrarë pronarin e kafenesë Vlado Popeski dhe mikun e tij Matej Gjurcevski. Në këtë sulm të armatosur janë plagosur edhe dy persona të tjerë që ishin në të njejtën tavolinë, transmeton INA.
Bëhet e ditur se vrasësi kishte borxhe nga bixhozi dhe se ai ditëve të fundit ishte zënë me pronarin e kafenesë.
Policia në një njoftim të shkurtër ka informuar se vrasësi rreth orës 21:30 ka hyrë në kafenenë “Piazza” dhe ka nisur zënkën me pronarin e lokalit dhe më pastaj ai ka nxjerrë pistoletën dhe ka shtënë ndaj katër të pranishmëve që ishin në një tavolinë. Vrasësi menjëherë është arratisur, por ai ka rënë në duart e policisë dhe është arrestuar.
Banorët e kësaj komune minore që banohet nga maqedonas janë shprehur të shqetësuar me incidentin e mbrëmshëm.