Profesori dhe studiuesi amerikan, Chris Dolan, tha se takimi mes kryeministrit të Kosovës, Albin Kurti dhe presidentit të Turqisë, Recep Tayyip Erdogan, është hap në drejtim të duhur pasi Ankaraja zyrtare mund ta ndihmojë Kosovën të anëtarësohet në NATO.
“Unë kam kritika për Kurtin, por ai ende duhet të punojë në qarqet diplomatike. Turqia ka ndikim të dukshëm në rajon dhe Kosova nuk mund t’i shpëtojë kësaj. Takimi me Erdogan-in është hapi i duhur. Dhe nëse Kosova dëshiron anëtarësimin në NATO, Ankaraja ka fuqi për ta bërë këtë”, shkroi Dolan në Twitter.
Turqia është një nga partnerët kryesorë të Kosovës, tha kryeministri Kurti në një konferencë të përbashkët për media me presidentin Erdogan, teksa shtoi se përtej bashkëpunimit të madh të dy vendeve deri më tani, ai do të duhet të rritet e të intensifikohet.
Ndërkaq, presidenti turk përsëriti se Turqia dhe kombi turk do të vazhdojnë të jenë gjithmonë përkrah “vëllezërve kosovarë” dhe se do ta ndihmojnë Kosovën të anëtarësohet në NATO, Këshillin e Evropës dhe në Bashkimin Evropian./albanianpost