Pas Leipzig, Lyon është surpriza e dytë e gjysmëfinaleve të Champions League. Ekipi francez mposhti 3-1 Manchester Cityn dhe në fazën tjetër do të ndeshet me Bayern Munchen. Vendi i shtatë në kampionatin francez shkon kaq larg, vërtet e pabesueshme!
Ndeshja është zhbllokuar në minutën e 24-t. Kanë qenë francezët që kanë shënuar me Cornet, teksa Qytetarët kanë pretenduar për një pozicion jashtë loje, por VAR ka konfirmuar se goli ka qenë i rregullt. 0-1 mbyllet pjesa e parë.
City ka mbyllur Lyonin në pjesën e dytë, por goli do të vinte vetëm në minutën e 69’, kur De Bruyne gjen bukur cepin e portës pas pasimit perfekt të Sterling. City merr zemër, mban topin deri në 71%, por golin e shënon Lyon.
Në 79’, Dembele del i vetëm përballë portierit dhe shënon, pavarësisht se portieri e prek. Është dashur sërish ndërhyrja e VAR, por goli është quajtur i rregullt. Në 87’ vjen goli i nokautit. Sërish Dembele që realizon, kësaj radhe me portën thuajse të boshatisur. Mbyllet 1-3, Lyon në gjysmëfinale.