Kryeprokurori i Prizrenit, Sylë Hoxha, ka thënë për Express, se nuk ka asnjë informacion nëse Shteti i Kosovës ka lejuar hetim ndërkombëtar lidhur me vdekjen e Astrit Deharit.
“Jo nuk kam asi informacionesh”, ka thënë Hoxha, të shtunën.
Analisti Halil Matoshi, përmes një njoftimi në FB, ka thënë se Shteti i Kosovës ka lejuar një shtet evropian të bëjë hetimet e pavarura lidhur me vdekjen e Astrit Deharit. As Avokati Tomë Gashi nuk ka konfirmuar diçka të tillë.
Sidoqoftë, Kryeprokurori që është marrë me hetimin e rastit të Astrit Deharit ka treguar se s’ka asgjë të re lidhure me këtë rast, përpos çfarë ka thënë në konferencë për media, ditën kur ka marrë raportin e autopsisë.
Raporti i Autopsisë ka konstatuar se Astrit Dehari kishte vdekur nga mungesa e frymëmarrjes e vetshkaktuar. Prej momentit kur ka vdekur Astrit Dehari, Lëvizja Vetëvendosje dhe avokati Tomë Gashi kishin hedhur akuza se Shteti kishte vrarë anëtarin e Partisë së Visar Ymerit.
Astrit Dehari ka ndërruar jetë të shtunë e kaluar pasi ishte i paraburgosur prej 67 ditëve si i dyshuar për sulm terrorist mbi ndërtesën e Kuvendit të Kosovës. Për këtë rast janë duke u hetuar edhe pesë zyrtarë të tjerë të VV’së, dy prej të cilëve ende ndodhën në paraburgim.