Listës së kandidatëve për kryeprokuror shteti i shtohet edhe Sylë Hoxha, i cili ka qenë zëvendësministër i Drejtësisë në vitin 2006
“Nuk e di nëse e kam përkrahjen nga politika. Por, nëse janë përkrah meje, unë i falënderoj, por ende nuk e di këtë, pasi kjo është faza fillestare dhe do të shihet rezultati. Unë po i dal zot kësaj pune, duke konsideruar se do ta kryej me nder, prandaj kushdo që më përkrah në këtë detyrë dhe kushdo që e jep kontributin në këtë drejtim, do ta falënderoj”, ka thënë ndër të tjera kryeprokurori i Prizrenit, Sylë Hoxha
Data 10 prill 2014 shënon dhe mbylljen e aplikimit për kryeprokuror të shtetit. 15 ditë afat, duke filluar që nga data 27 mars 2014, kanë pasur për të aplikuar kandidatët që synojnë drejtimin e Prokurorisë së Shtetit dhe njëherësh atë të Këshillit Prokurorial të Kosovës.
Një ndër kandidatët, i cili nuk është shprehur më herët, por që ka aplikuar, është edhe anëtari i KPK-së, Sylë Hoxha. Ky i fundit është zgjedhur pjesë përbërëse e Këshillit Prokurorial të Kosovës në dhjetor të vitit 2012. Ndërsa, ka vijuar ta ushtrojë zyrtarisht këtë detyrë si përfaqësues i prokurorëve të prokurorive themelore, nga 1 janari i vitit 2013, kur sistemi prokurorial startoi riorganizime strukturore./Kosova Sot/