“Elvis, gjaku yt, gjaku jonë – ata marrin jetë, ne shpëtojmë për ty”, është motoja e ditës së shtunë kur edhe do të dhurohet gjaku në parkun e qytetit nën organizimin e grupit të të rinjve dhe Iniciativës Pozitive, raporton Rahoveci24.
Iniciativa Pozitive dhe grupi i të rinjve që ka punuar me Elvis Pistën gjatë fushatës elektorale kanë vendosur që me rastin e javës së dhurimit të gjakut, të shtunën të mbahet në një moto të veçantë ky organizim.
Për nderë të heroit të rënë të qytetit, Elvis Pista, u bëhet thirrje të gjithë qytetarëve që t”i bashkëngjiten kësaj iniciative bamirëse, ashtu siç ka qenë vet heroi Elvis Pista.
Organizimi mbahet nga ora 11:00 deri në ora 16:00 të ditës së shtunë dhe atë e përkrah edhe Kuvendi Komunal, Qendra për Transfuzionin e Gjakut dhe lokali Movenpick, me në krye Mentor Veliun.
Kjo është më e pakta që mund të bëhet për heroin e rënë, Elvis Pista, i cili u vra në një akt qyqar prapa shpine në prani të bashkëshortes, teksa po festonte ditëlindjen e saj.
Elvis Pista fitoi votat e mjaftueshme për të përfaqësuar Rahovecin në Kuvendin e Kosovës si deputet, dhe priste vetëm certifikimin e rezultateve nga KQZ.