Shtetet e Bashkuara shënojnë sot përvjetorin e trembëdhjetë të sulmeve terroriste të 11 shtatorit, 2001. Me ketë rast kryeministri në largim i Kosovës, Hashim Thaçi, ka shkruar në profilin e tij në Facebook se Kosova me krenari vazhdon të jetë përkrah popullit amerikan dhe në një front të bashkuar kundër terrorizmit dhe ekstremizmin vrastar, që po vazhdon t’i cenojë vlerat e përbashkëta.
“Para trembëdhjetë vitesh, populli i Kosovës i tmerruar, si e tërë bota, u bë dëshmitar se si terroristët goditën Shtetet e Bashkuara më 11 shtator 2001, duke vrarë mijëra civilë të pafajshëm, në mesin e tyre edhe shqiptarë. Njerëzit në të gjithë Kosovën mbajtën zi për të vdekurit dhe ndan pikëllimin e tyre me popullin amerikan. Populli i Kosovës mbetet falënderues përjetësisht ndaj SHBA-ve për lirinë dhe pavarësinë që e gëzojmë ne sot. Prandaj ne me krenari vazhdojmë të jemi përkrah popullit amerikan dhe të vendosur të mbesim në një front të bashkuar kundër terrorizmit dhe ekstremizmin vrastar, që po vazhdon t’i cenojë vlerat e përbashkëta. Sot, sikurse edhe më 11 shtator 2001, ne të gjithë jemi amerikanë”, ka thënë Thaçi.