Pavarësisht problemeve që i dolën Ministrisë së Kulturës, Rinisë dhe Sportit gjatë procesit të renovimit të TKK-së, punime te cilat u ndërprenë dy herë, duket se ky institucion është gati për sezonin e ri vjeshtor.
Teatri Kombëtar i Kosovës hapi zyrtarisht dyert për sezonin e vjeshtës me 1 shtator, por për një premierë filmi, ndërsa në bazë të programit të publikuar nga ky institucion, shfaqjet fillojnë që nga 2 shtatori.
Pas filmit “Babai” të regjisorit Visar Morina që u ekranizua në TKK, vijnë me radhë shfaqjet “Çehovi i thotë lamtumirë Tolstoit”, “Gishti”, “Ferma e Kafshëve” e të tjera dhe gjithashtu disa shfaqje baleti.
Drejtori artistik i TKK-së, Agon Myftari, tregoi për KosovaLive para disa ditësh se Teatri Kombëtar po pret që në fillim të muajit shtator të miratohet edhe një projekt i skenës së madhe që do të realizohet gjatë muajve në vazhdim.
Ky sezon i ri e gjen trupën e Teatrit Kombëtar më të kompletuar dhe më të madhe për nga numri i aktorëve.
Shkelzen Veseli, Adrian Morina, Armend Ismajli, Armend Baloku, Ylber Bardhi, Teuta Krasniqi, Arta Selimi, Semira Latifi, Majlinda Kosumoviq dhe Albulena Kryeziu janë aktorët e rinj që tash e tutje do të ngjitën më shpesh në skenën e Teatrit Kombëtar të Kosovës, krahas atyre më të vjetërve që ishin gjithsej 18, pra tani ansambli rezident i Teatrit Kombëtar të Kosovës i ka 28 aktorë që pritet të angazhohen në shfaqjet e reja.