Para dy vjetësh, Kuvendi i Kosovës kishte miratuar ndryshimet kushtetuese me të cilat përmbyllej faza e mbikëqyrjes ndërkombëtare të pavarësisë. Ajo ditë, ishte cilësuar si historike dhe përcaktuese për Kosovën si shtet të pavarur e sovran. Pakoja ligjore, parashihte ndryshime në 22 ligje dhe amendamentime kushtetuese me atë të cilave bëhej i mundur tranzicioni nga ndërkombëtarët tek institucionet e Kosovës.
Ky tranzicion është pritur të përmbyllet nga qershori i vitit 2014. Por, kjo nuk ka ndodhur dhe Kosova, faktikisht ka mbetur ende në një lloj mbikëqyrje ndërkombëtare. Florent Muçaj, nga Instituti për Studime Kushtetuese e Parlamentare i përfshirë në gjithë procesin e ndryshimeve ligjore mendon se zbatimi i pakos së ligjeve që parashihnin tranzicionin ishte mjaftë i brishtë dhe mbetet i papërfunduar.
Ai veçon dy raste që e dëshmojnë tranzicionin e papërfunduar nga ndërkombëtarët tek institucionet e vendit. “Akoma kemi një mbikëqyrje ndërkombëtare faktike të papërfunduar, sepse akoma Auditori i Përgjithshëm është ndërkombëtar e po ashtu edhe gjyqtarëve ndërkombëtarë në Gjykatën Kushtetuese, së fundit u është vazhduar mandati nga presidentja”, ka thënë Muçaj…/tribuna/