Për të shtatën ditë, kompanitë e kontraktuara nga Komuna e Prizrenit kanë larguar tarracat dhe tejkalimet nga lokalet në Qendrën Historike.
Të martën, aksioni ka vazhduar për largimin e konstruksioneve metalike në lokalet që gjenden në sheshin Shadërvan, raporton KTV.
Pronarët e lokaleve nuk kanë pranuar të flasin para kamerës, por kanë thënë se nuk janë të kënaqur me aksionin e komunës, pasi, sipas tyre, ata nuk u njoftuan paraprakisht.
Megjithatë, drejtori i Inspektoratit ka thënë se ata janë njoftuar qysh në muajin dhjetor.
Aksioni është mirëpritur nga Qendra Rajonale për Trashëgimi Kulturore dhe qytetarët e Prizrenit.
Sipas tyre, qyteti është ngulfatur nga ndërtimet pa leje.
Komuna e Prizrenit u bën thirrje të gjithë pronarëve të objekteve afariste brenda Qendrës Historike që t’i lirojnë hapësirat publike.
Aksioni për lirimin e hapësirave dhe reklamave të vendosura pa leje do të vazhdojë edhe javën tjetër.