Pas hapjes së mbrëmshme po vazhdon sot (të dielën) dita e dytë e festivalit të filmit të shkurtër e dokumentar, DokuFest.
Në konferencën e parë që u mbajt për media folën Veton Nukollari, drejtor artistik i festivalit, Jamie Donoghue, regjisor, Kushtrim Xhakili, nga DokuTech dhe Agnieszka Zwiefka regjisore.
Nukollari shpalosi në pika të shkurta programin e ditës së sotme, ai foli për filmat që do të shfaqen, punëtoritë dhe debatet që do të organizohen.
Ai gjithashtu tha se ata si organizatorë janë të kënaqur me hapjen e festivalit dhe fluksin e vizitorëve që kanë ardhur këtu.
“Ne jemi shumë të kënaqur me fillimin dhe hapjen e festivalit. Duke marrë parasysh temën ne nuk bëmë një hapje me bujë. Gjithsesi, DokuFesti nuk është festival i tepihut të kuq. Me filmin që shfaqëm deshëm të tregojmë se bashkëndjejmë dhimbjen e atyre që marrin rrugët e migrimit”, tha ndër të tjera ai.
Dy regjisorët thanë në pika të shkurtra përshtypjet e tyre për festivalin kurse Kushtrim Xhakili foli për konferencën e teknologjisë, DokuTech,e cila është bashkëpunim mes IPKO Foundation, Dokufest dhe SHARE e që sivjet po organizohet për herë të dytë.