Komunat veriore të Kosovës kërkojnë të respektohet neutraliteti në raport me pavarësinë e Kosovës. Kështu, në vend të Kushtetutës dhe ligjeve të Kosovës, komunat veriore me organet e dala nga zgjedhjet e fundit lokale janë përcaktuar për Rezolutën 1244 të Këshillit të Sigurimit dhe Marrëveshjen e 19 Prillit të arritur në Bruksel në dialogun politik ndërmjet Prishtinës dhe Beogradit.
Këto veprime, bien ndesh me deklarimet e institucioneve qendrore të Kosovës se me dialogun dhe Marrëveshjen e Brukselit si dhe pjesëmarrjen e serbëve lokalë në zgjedhjet lokale, këto komuna kanë pranuar integrimin në kuadër të institucioneve dhe juridiksionit të vendit,shkruan tribuna.
Në harmoni me interpretimin që Beogradi i bën Marrëveshjes së Brukselit si neutrale në raport me statusin e Kosovës, katër komunat veriore kanë aprovuar statute që nuk janë në pajtim me Kushtetutën dhe ligjet e Kosovës, por në përputhshmëri me Rezolutën 1244. Qeveria e Kosovës i ka shpallur këto statute si joligjore dhe ka këkruar që ato të plotësohen dhe harmonizohen me Kushtetutën dhe ligjet e Kosovës