Me 69 vota për, 9 vota kundër dhe një abstenim, deputetët e Kuvendit të Kosovës kanë miratuar në lexim të dytë Projektligjin për ndryshimin dhe plotësimin e Ligjit për statusin dhe të drejtat e dëshmorëve, invalidëve, veteranëve, pjesëtarëve të UÇK-së, viktimave civile të luftës dhe familjeve të tyre.
Megjithatë, për disa nga deputetët mbetet diskutabile çështja financiare në zbatimin e këtij projektligji.
Për Time Kadrija, deputete e AAK-së, ky projektligj është i mirëseardhur pasi këtu janë përfshirë edhe femrat e dhunuara gjatë luftës.
“Me këtë projektligj po mendojmë që në një farë forme është një shpresë për të gjitha ato gra që do të trajtohen në mënyrë institucionale të cilat do të kenë edhe beneficione materiale edhe beneficione të tjera. Janë të përfshira të gjitha ajo çka është debatuar në seancë është për një kategori të viktimave civile dhe ky projektligj ka qenë në plotësim- ndryshim. Dhe plotësim- ndryshimi ka ardhur për përfshirjen e femrave të dhunuara, ndërsa, edhe viktimat civile të cilat u debatuan sot kategoritë e tjera janë të përfshira në ligjin bazë”, ka thënë Kadrija.
Ndërsa, për deputeten e LDK-së, Alma Lama në këtë projektligj e keqja është që nuk është miratuar buxhet i cili do t’i vinte në ndihmë sado pak këtyre viktimave.
Ajo ka thënë se Komisioni për Shëndetësi ka propozuar që për këtë kategori të ndahen rreth 74 milionë euro.
“Pas më shumë se një viti kur është bërë leximi i parë i këtij projektligji tash më sot ia dolëm që të miratohet më shumë vonesë në këtë projektligj janë përfshirë viktimat e dhunës seksuale, mirëpo, e keqja është që nuk është miratuar buxhet i cili do t’i vinte në ndihmë sado pak këtyre viktimave”, ka thënë Lama.
Ndryshe, Kadrija, ka thënë se sipas disa shifrave thuhet se janë diku rreth 20 mijë gra të dhunuara gjatë luftës, mirëpo, sipas saj nuk ka shifra zyrtare. Ajo tha se në ligjin që është miratuar është lënë një hapësirë kohore rreth 4 vjet që femrat kanë mundësi të lajmërohen.
Kadrija i ka ftuar viktimat e dhunuara seksualisht gjatë luftës që të aplikojnë për beneficione pasi sipas saj nuk është turp ajo çfarë u ka ndodhur.