Lëvizja Vetëvendosje në Prizren, përmes një komunikate për media ka thënë se viti i ri shkollor në arsimin e Prizrenit nuk ka asgjë të re, pasi drejtori i dënuar është zëvendësuar me një të hetuar.
“Viti i kaluar shkollor u përcoll me skandalet e ish drejtorit të arsimit, ndërsa fillimit të këtij viti shkollor po i prijnë hetimet ndaj drejtorit të sapozgjedhur të po kësaj Drejtorie.
Ky vit shkollor, për Komunën e Prizrenit, po fillon me një drejtor të arsimit, i cili fillimisht është i pensionuar dhe ende pa ardhur në postin e drejtorisë së Arsimit ishte nën hetime për falsifikim dhe shkelje ligjore”, thuhet në komunikatë të VV-së, përcjellë PrizrenPress.
Komunikata e plotë:
Lëvizja VETËVENDOSJE! të gjithë mësimdhënësve, filloristëve që ulen për herë të parë në bankat e shkollës, nxënësve të tjerë filloristë dhe atyre parauniversitarë jua uron vitin e ri shkollor.
Në arsimin e Prizrenit asgjë e re – drejtori i dënuar zëvendësohet me një të hetuar
Pa fajin tuaj, viti i ri shkollor u politizua nga Qeveria për të krijuar huti, panik dhe pasiguri në popull, sepse me 1 shtator Qeveria i mbushi rrugët dhe sheshet e kryeqendrës së Kosovës me policë, vetëm e vetëm për t’i shtyrë dhunshëm agjendat e veta.
Arsyetimi i shtyrjes së vitit shkollor nga ana e Ministrisë së Arsimit, Shkencës dhe Teknologjisë për dy ditë ishte edhe një tjetër broçkull e sojit alla pronto, sepse, nisur nga praktikat e viteve të kaluara, jo të gjitha tekstet shkollore kanë qenë të qasshme nga ana e nxënësve. Është jo pedagogjike t’i thuhet dikujt- po rren, por këta, jo vetëm këtë herë, por në mënyrë të vazhdueshme, po rrejnë dhe po mashtrojnë.
Viti i kaluar shkollor u përcoll me skandalet e ish drejtorit të arsimit, ndërsa fillimit të këtij viti shkollor po i prijnë hetimet ndaj drejtorit të sapozgjedhur të po kësaj Drejtorie.
Ky vit shkollor, për Komunën e Prizrenit, po fillon me një drejtor të arsimit, i cili fillimisht është i pensionuar dhe ende pa ardhur në postin e drejtorisë së Arsimit ishte nën hetime për falsifikim dhe shkelje ligjore .
Një fjala e urtë popullore thotë: “Dita e mirë shihet në mëngjes.”
Mëngjesi për arsimin e Komunës së Prizrenit mbetet e zymtë. Çfarëdo që të jenë angazhimet e partisë në pushtet, për qeverisje më të mirë të Arsimit në Komunën e Prizrenit, ato nuk do të sjellin rezultate, sepse në vend që të angazhohen për të pajisur kabinete me teknologji bashkëkohore ata mbushin xhepat e tyre, duke mos lënë anash edhe punësimin e fëmijëve, farefisit dhe të servilëve të tyre.
Këto ju, mësimdhënës, i dini më së miri.
Profesionin tuaj të shenjtë e kanë degraduar këta që përditë thirren në vlera të mirëfillta, ndërsa mbushin vetëm xhepat e tyre.
Kjo mendësi e kësaj qeverisje duke udhëhequr me njerëz të kriminalizuar ka bërë që te ju, mësimdhënës të të gjitha shkollave, të mbjellin frikë në mënyrë që të mos keni guxim e të ngrehni zërin tuaj për keqpërdorimet nëpër institucionet arsimore përkatëse, për shkak të hakmarrjes eventuale.
Lëvizja VETËVENDOSJE! arsimin e sheh si mënyrë për zhvillimin e burimeve njerëzore, të cilat pastaj do të kontribuojnë për zhvillimin ekonomik dhe shoqëror. Një prej shumë iniciativave të Lëvizjes VETËVENDOSJE! do të jetë që drejtori i shkollës duhet të emërohet nga Këshilli i Shkollës, ndërsa personeli tjetër nga drejtori.
Lëvizja VETËVENDOSJE! do t’i iniciojë ndryshimet e nevojshme në legjislacion që shkolla dhe komuniteti i saj ta bartin përgjegjësinë .
Është e domosdoshme që politikat e arsimit të zhvillohen në bazë të të dhënave konkrete me informata (mbi performancën, shkollimin e prindërve, gjendjen socio-ekonomike) për secilin nxënës në secilën shkollë që mund të arrihet përmes zhvillimit të një sistemi të menaxhimit të informatave të arsimit.
Është më se e nevojshme që përfundimisht kabinetet e shkollave përkatëse të pajisen me teknologji informative.
Në Alternativën Qeverisëse të Lëvizjes VETËVENDOSJE! është paraparë që mësimdhënësit që angazhohen për mësim shtesë do të kenë edhe pagesë shtesë për këtë angazhim.
/PrizrenPress.com/