PSG-ja humbi 1-2 në fushën e vet përballë Nantes. Disfatë befasuese për kampionët e Francës, teksa hidhërimi ka qenë i dyfishtë për Angel Di Maria dhe Marquinhos.
33-vjeçari argjentinas rinovoi kontratën tre ditë më parë, ndërsa gjatë takimit së mbrëmjes së kaluar ka marrë një lajm shumë të keq.
Disa hajdutë kanë pritur nisjen e ndeshjes për të hyrë në shtëpinë e lojtarit ofensiv. Momente paniku dhe tmerri për gruan dhe vajzat e Di Marias.
Trajnerit Pochettino i kanë kërkuar zëvendësimin e lojtarit, i cili doli nga fusha në minutën e 62-të për t’u nisur menjëherë drejt të dashurve të tij.
Për fat të mirë, familjarët e Di Marias nuk kanë pësuar lëndime nga grabitësit, por tmerri i përjetuar i ka tronditur jashtë mase.
Viktime e një grabitje ka qenë edhe Marquinhos. Hajdutë janë futur edhe në shtëpinë e mbrojtësit brazilian mbrëmjen e kaluar, aty ku ka qenë babai i tij.
Situata në këtë rast nuk ka qenë aq e tmerrshme dhe klubi e ka njoftuar Marquinhos për ngjarjen e ndodhur vetëm në fundin e ndeshjes.