Lideri i Vetëvendosjes, Visar Ymeri, në një deklaratë të tij të publikuar në Facebook, ka bërë përgjegjës Zëvendëskryeministrin Hashim Thaçi për dështimin e Kosovës në UNESCO.
Kështu, ai u është përgjigjur akuzave të Thaçit – i cili një ditë më parë ka thënë se fajtore për këtë çështje ishte Serbia em fushatë anti-europiane dhe Opozita e Kosovës që shpërndau pamje me gaz lotsjellës në Kuvend.
Ky është shkrimi i plotë i Ymerit:
Dështimi për t’u anëtarësuar në UNESCO do të na ndjekë, neve si shtet, për një kohë të gjatë. Përgjegjësia e drejtpërdrejtë politike bie mbi Hashim Thaçin, tash ministër i jashtëm e më parë kryeministër i Republikës.
Ka shumë faktorë që e kanë kushtëzuar këtë dështim. Por kryesori nga ta lidhet me Hashim Thaçin, me paaftësinë, sharlatanizmin e ambicien e tij të sëmurë personale.
Dështimi për sigurimin e votave madje edhe të shteteve që na kanë njohur nuk do koment. Aq më i rëndë është fakti kur 3 vende, Japonia, Polonia e Koreja e Jugut, të cilat abstenuan, janë njëkohësisht shtete të cilat nuk kanë nguruar fare ta njohin Kosovën dhe në të cilat ndikimi diplomatik i ShBA-ve është jashtëzakonisht i madh. Si dështoi Thaçi t’i sigurojë të paktën këto vota PËR? Apo edhe këto na qenkan vende diktatoriale!?
Procesi nuk duket të ketë qenë i mbështetur, ashtu siç po thuhet, nga shtetet e Quintit që nga fillimi i tij.
Fushata ka qenë e orientuar kah diplomacia publike e jo kah ajo klasike, për qëllime promovimi personal të Hashim Thaçit e Petrit Selimit, e që rezultoi në fund me disfatë të madhe. Ajo është udhëhequr si ndërmarrje private e Hashim Thaçit. Ndërkohë që tash dështimin po do t’ia faturojë tërë Republikës së Kosovës.
Fushata e Hashim Thaçit e Petrit Selimit nuk e ka respektuar fare parimin e konfindencialitetit dhe heshtjes duke bërë shumë bujë e tepër shumë reklamë personale nëpër rrjetet sociale e faqen e internetit të MPJ-së, gjë që e ka dëmtuar shumë procesin e lobimit.
Hashim Thaçi është sjellur karshi konferencës së UNESCO-s sikur aty shefa të shefave të ishin Adem Grabovci e Ismet Beqiri, të cilët i “sjellë e i pshtjellë”. Por ja që kjo sjellje e pshtjellje e Hashim Thaçit po i kushton shumë shtrenjtë Republikës së Kosovës dhe qytetarëve të kësaj Republike.
Nuk mund të shpëtohet edhe Thaçi edhe Republika. Ne duhet ta shpëtojmë Republikën. Prandaj Thaçi duhet të dorëhiqet.