Deputeti i Nismës për Kosovën, Zafir Berisha ka thënë se ai mbetet ende pjesë e këtij subjekti politik.
“Valdete Daka e KQZ-së është vënë në test nga bandat e politikës, për të marrë vendim ndaj meje, prandaj unë kam shkruar për rrëzimin e Qeverisë”, thotë Berisha, ndërsa e ka përsëritë se nëse nesër do të bëheshin 60 vota, ai do ta jepte votën e 61-të për rrëzimin e Qeverisë.
Ai ka mohuar ta ketë marrë ndonjë telefonatë nga opozita lidhur me deklaratat e tij.
“Opozita e ka të vështirë t’i bëjë 59 vota, për fatin e keq të opozitarizmit në Kosovë”, shprehet ai, shkruan Rrokum TV.
Deputeti Berisha ka sqaruar pse nuk e ka votuar Qeverinë Haradinaj.
“Kam ndjerë keqardhje për pozitën e rëndë, në të cilën e ka sjellë Ramush Haradinaj, por unë ia kam komunikuar vendimin tim, sepse me gjithë respektin e madh për të, respekti im më i madh është për Kosovën”, është shprehur Berisha.
Ndër arsyet kryesore përse nuk ka votuar për këtë qeveri, Berisha përmend ndikimin e presidentit Hashim Thaçi, sipas tij në bërjen e koalicionit qeverisës.
“Me inicimin e Hashim Thaçit është bërë ky koalicion”, thotë ai.
Deputeti Berisha në vazhdim e ka quajtur të padrejtë vendimin e KQZ-së për largimin e tij nga gara për kryetar të Prizrenit.
“Krejt kjo ka të bëjë me një gjobë në shumë prej 140 euro”, thotë ai, duke shtuar se dikush ka qenë i rrezikuar nga kandidimi i tij në Prizren.
“Kanë menduar se me ‘eliminimin’ tim, elektorati i Nismës ka me votuar për PDK-në”, shprehet Berisha.
Berisha thotë se nesër pret vendimin e Supremes për vendimin ndaj tij, ndërsa paralajmëron se nuk do të ndalet me ankesa për këtë çështje, edhe nëse Supremja e vërteton vendimin në fjalë.
Në fund, Berisha thotë se është i bindur në fitoren e Nismës në Prizren në zgjedhjet e 22 Tetorit, me apo pa kandidimin e tij. /Telegrafi/