Pas shkarkimit të tij nga detyra e Rektorit të Universitetit të Prishtinës, Ramadan Zejnullahu ka thënë se sot ka fituar ideja e mashtrimit dhe shantazhit, të cilën e përkrahin njerëz të fuqishëm.
Ai, ka thënë se vendimi i sotëm i Këshillit Drejtues nuk kishte të bënte me të apo stafin e tij, por me idenë e reformës dhe progresit që ata e përkrahnin.
“Vendimi i sotëm i Këshillit nuk kishte të bënte me mua ose me stafin tim, por me idenë e reformës dhe progresit që ne po e përkrahim fuqishëm dhe idenë e mashtrimit dhe shantazhit që e përkrahin disa njerëz të fuqishëm. Sot, fatkeqësisht, fitoi kjo e dyta”, ka thënë Zejnullahu.
Megjithatë, ka thënë Zejnullahu, beson në fuqinë e UP-së, duke respektuar vlerat dhe duke ndërtuar institucione që punojnë për të mirën e përgjithshme, e jo për klanë njerëzish të fuqishëm.
“Unë ende besoj në fuqinë e UP-së dhe të shoqërisë sonë për t’u transformuar, duke respektuar vlerat e duke ndërtuar institucione që punojnë për të mirën e përgjithshme e jo për klane njerëzish të fuqishëm. Unë do të vazhdoj ta jap kontributin tim për të mirën e UP-së në cilëndo pozitë që jam. Forca e dijes dhe arsyes do të triumfojë herët apo vonë. Rrugës do të humbim shumë beteja, por nuk duhet të ndalemi”, ka thënë Zejnullahu.
Ndryshe, ai u shkarkua para pak çastesh, pasi gjashtë (6) anëtarët e Këshillit votuan pro këtij vendimi./Indeksonline
…………..
Shkarkohet rektori Ramadan Zejnullahu
Iniciativa e senatorëve të UP-së për shkarkimin e rektorit Ramadan Zejnullahu u miratua në Këshillin Drejtues.
Anëtarët e këtij këshilli i dhanë mbështetje kërkesës së senatorëve për shkarkimin e Zejnullahut.
Votimi i fshehtë tregoi që të 6 anëtarët e Këshillit votuan pro shkarkimit./Kallxo.com