Zgjedhjet parlamentare, që do të mbahen në Serbi në fund të marsit dhe në Kosovë në qershor, do të shkaktojnë vonesa dhe pengesa si në procesin e zbatimit të marrëveshjes së 19 prillit, ashtu edhe në vazhdimin e dialogut Kosovë-Serbi. Kështu të paktën vlerësojnë përfaqësuesit e partive politike dhe analistët kosovarë.
Sipas tyre, megjithëse do të ketë vonesa, procesi nuk do të ndalet, pasi që kjo tashmë është në agjendën edhe të vetë Bashkimit Evropian.
Zëvendëskryeministri i Kosovës, Hajredin Kuçi, ka deklaruar se zgjedhjet do të ndikojnë dukshëm si në dinamikën e zbatimit të marrëveshjes, po ashtu edhe në vazhdimin e dialogut.
“Është një zotim i palëve që të mos ndalet dialogu, por me siguri që ndikon në dinamikën e dialogut dhe zbatimin e marrëveshjeve”, ka deklaruar Kuçi, transmeton Zëri.