Çmimet Oskar ndahen sot në “Dolby Theatre”, Hollywood, Los Angeles. Këto çime ndahen për 24 kategori dhe përfshijnë ndër të tjera çmimet Oskar për: aktorët, regjisorët, efektet vizuale dhe makijazhin.
Në listën me 9 filma, të nominuar për çmimet prestigjioze janë: drama “American Hustle” , “Captain Phillips” dhe filma “Gravity”, “Dallas Buyers Club”, “Her”. Këta kryesojnë nominimet për çmimet Oskar. “American Hustel” dhe “Gravity” kryesojnë me nga 10 nominime secili. “American Hustle” kandidon në të gjitha kategoritë për aktorët me Christian Bale, Amy Adams, Bradley Cooper dhe Jennifer Lawrence, ndërsa në garën për figurën më të mirë, përballë ka “Gravity”, regjisori i të cilit, Alfonso Cuaron është kandiduar për regjinë më të mirë, ndërsa protagonistja Sandra Bullock, si aktorja më e mirë. “The Wolf of Wall Street”, “Nebraska” dhe “12 Years a Slave” janë gjithashtu pretendentë.
“American Hustle” është filmi i 15- të në historinë e çmimeve Oskar, që nominohet në katër kategoritë vlerësuese për aktorët, megjithëse asnjëherë nuk ka ndodhur që një film t’i fitojë që të gjitha këto kategori. Në garën e nxehtë për çmimin aktori më i mirë janë nominuar Christian Bale, i cili interpreton tek “American Hustle”, Bruce Dern Nebraska dhe Leonardo DiCaprio te “The Wolf of Wall Street”. Për çmimin aktorja më e mirë garojnë tri aktore mjaft të suksesshme, Amy Adams, e cila interpreton në filmin “American Hustle”, Cate Blanchett, Blue Jasmine, Sandra Bullock te “Gravity”, Meryl Streep te “August: Osage County”. Në nominimet e edicionit të 86-të të “Academy Awards”, numri i nominimeve që filmat “Gravity” dhe “American Hustle” kanë arritur arrin plot 10 nominime në kategori të ndryshme, kurse personazhet me numrin më të lartë të nominimeve janë, Alfonso Cuaron dhe Spike Jonze, me nga 3 nominime secili. Organizatorët premtojnë një mbrëmje mahnitëse.
Si çdo vit një vend të veçantë protagonistët i kanë dedikuar edhe stilit të të veshurit, pasi çdo vit media rozë nuk i kursen në kritika apo vlerësime. Edicioni i 86-të i Oskarit do të vijë nën prezantimin e Ellen DeGenere-s. Pjesëmarrës do të jenë edhe: Angelina Jolie, Brad Pitt, Zac Efron, Emma Watson, Kristen Bell, Jennifer Garner, Bradley Cooper, Charlize Theron etj. Çmimet e përvitshme për arritjet më të mira të kinematografisë tërheqin vëmendjen e mbarë globit mbi Hollywood- in. Nesër disenjatorë të njohur prezantojnë punimet e tyre. Kjo lagje e Los Angeles-it prej dekadash ka qenë e lidhur me filmin. Përballë teatrit ku do të ndahen çmimet Oskar, Muzeu i Hollywood-it do të presë vizitorë në një ndërtesë që dikur ishte studioja e makiazhistit “Max Factor”.
Në këtë muze ekspozohen relike të Hollywood-it, përfshirë sandalet e kuqe që Judy Garland kishte veshur në filmin “Wizard of Oz”, si dhe fustani që veshi aktorja Barbara Stanwyck gjatë ceremonisë së Oskarit, vite më parë. Punonjësit e skenës po përgatisin “Dolby Theatre”, ku do të mblidhen nesër emrat më të njohur të Hollywood-it për Çmimet e Akademisë së Filmit dhe Shkencës. Ky aktivitet tërheq vëmendjen e medieve, por edhe të vizitorëve të ndryshëm. Përgatiti: Valeria Dedaj
Më të pasurit e çmimeve Oskar?
Kompania ndërkombëtare nga Singapuri, “Wealth X”, ka hartuar listën e yjeve më të pasur të Hollywood-it, të cilët në karrierën e tyre kanë arritur të fitojnë çmimin Oskar. Regjistrimi i multimilionerëve është publikuar para disa ditësh nga ndarja zyrtare e trofeve, që mbahet nesër në teatrin “Dolbi”, në Los Angeles, nën drejtimin e Ellen DeGenere-s.
1. Jack Nicholson – 3 Oskar – 390 milionë dollarë
2. Tom Hanks – 2 Oskar – 350 milionë dollarë
3. Robert de Niro – 2 Oskar – 310 milionë dollarë
4. Barbra Streisand – 1 Oskar – 310 milionë dollarë
5. Sean connery – 1 Oskar – 250 milionë dollarë
6. George Clooney- 1 Oskar – 220 milionë dollarë
7. Michael Douglas – 1 Oskar – 200 milionë dollarë
8. Anthony Hopkins – 1 Oskar – 160 milionë dollarë
9. Robin Williams – 1 Oskar – 150 milionë dollarë
10. Sandra Bullock – 1 Oskar – 150 milionë dollarë