Kuvendari i Bashkimit Demokratik (BD) në Prizren, Skender Susuri, është shprehur i habitur me shfuqizimin e vendimit të Kuvendit, për emërimin e Mujë Berishës, si anëtar i Këshillit të Trashëgimisë Kulturore në Prizren.
“Zyrtarë të këtij dikasteri qeveritar nuk duhet të bien pre e postimeve nëpër rrjetet sociale, dhe se nuk duhet të luhen lojëra politike rreth të përzgjedhurit Berisha, i cili është plotësisht i pafajshëm pas vuajtjes së dënimit 6 mujor të burgut , të cilin ai së bashku me disa persona të tjerë ishin dënuar nga gjykata kohë më parë”, ka thënë Susuri.
“Nuk duhet të zhvlerësohet personaliteti i Mujë Berishës, i cili për shumë vite me mjaft sukses ka ushtruar detyrën e përgjegjësit të Arkivit Ndërkomunal në Prizren”.
Rreth kësaj çështje të ngritur në seancën e sotme të Kuvendit të Prizrenit, përveç kuvendarit Susuri, nuk kanë reaguar as këshilltarët tjerë të cilët e kanë votuar , Mujë Berishën, për anëtar të KTK-së në Prizren.
Ministria e Kulturës ka shfuqizuar vendimin e Kuvendit të Prizrenit,për emërimin e Mujë Berishës, si anëtar i Këshillit të Trashëgimisë Kulturore në Prizren.
Anëtarët e Kuvendit Komunal të Prizrenit me shumicë votash kanë zgjedhur Mujë Berishën për anëtar të Këshillit të Trashëgimisë Kulturore të Qendrës Historike të këtij qyteti, vend ky që kishte mbetur i zbrazët pas dorëheqjes së ish-kryetarit të këtij trupi këshillëdhënës, Vesel Hoxhaj,
Ndonëse Berisha ishte i katërti në listë për nga pikët e fituara pas vlerësimit të Komisionit përkatës Komunal, megjithatë këshilltarët e KK-së janë përcaktuar që ta mbështesin kandidaturën e tij. Veç kësaj Berisha ka një dosje në organet gjyqësore pasi më 2013 u dënua për mashtrim në votime. /TV Prizreni