Ish-ushtari i Ushtrisë Çlirimtare të Kosovës, Nait Hasani, paralajmëroi trazira në rast të dënimit të ish-Presidentit Hashim Thaçi, duke u shprehur i shqetësuar për proceset gjyqësore në Gjykatën Speciale në Hagë ndaj ish-udhëheqësve të luftës çlirimtare të Kosovës, gjatë një interviste në emisionin “Politiko”.

Hasani theksoi se edhe pas 26 vjetësh nga përfundimi i luftës dhe gjenocidit që Serbia ka kryer në Kosovë, drejtësia po kërkohet ndaj atyre që e drejtuan luftën për liri, dhe jo ndaj autorëve të masakrave.

“Gjithë ky krim, gjithë këto masakra, gjithë ky gjenocid, ky tmerr – ne ende sot jemi duke u përball me Gjykata Speciale në Hagë. Sot i kemi njerëzit që e kanë drejtu luftën atje. Atje po gjykohet lufta jonë, historia jonë. Asnjë nuk po gjykohet për shembull për ndonjë vepër pas lufte.

26 vjet pas nga ky gjenocid që është bërë, ata atje gjykohen për lirinë tonë. Po nëse gjykohet Hashim Thaçi, kush na siguron neve që nuk do të ketë trazira në rajon. Një luftë e jona, një liri e jona me dalë në bankë të të akuzuareve .” – tha Hasani.

Prokuroria Themelore, përmes Departamentit për Krime të Rënda, ka ngritur aktakuzë kundër tetë zyrtarëve të lartë për përfshirje në manipulim të tenderëve publikë dhe keqpërdorim të pozitës zyrtare.

Të pandehurit Xh.D., Y.G., Q.K., S.V., E.Sh., L.S., B.J. dhe D.N. akuzohen se më 4 gusht 2022, në bashkëpunim me njëri-tjetrin, kanë kryer vepra penale që lidhen me keqpërdorim të pozitës zyrtare dhe mashtrim në prokurim publik, gjatë procesit të tenderimit për projektin “Renovim dhe mirëmbajtje të objekteve të Komunës së Prizrenit”.

Sipas aktakuzës, zyrtarët, të cilët ishin pjesë e komisionit për vlerësimin e ofertave, kanë shkelur qëllimisht detyrat ligjore për të favorizuar konsorciumin e operatorëve ekonomik “P.C.G. Sh.P.K.” dhe “A.-T. Sh.P.K.”, duke u mundësuar atyre përfitim të paligjshëm nëpërmjet manipulimit të dokumentacionit dhe çmimeve të ofertuara.

Ndër të akuzuarit figuron edhe Edin Shehu, drejtor i administratës në Komunën e Prizrenit, i cili sipas Prokurorisë ka ushtruar ndikim të drejtpërdrejtë në proces, në cilësinë e mbikëqyrësit të menaxherit të projektit. Ai dyshohet se ka ndihmuar operatorët ekonomik që të manipulojnë me çmimet për njësi, duke krijuar favore në dëm të konkurrencës dhe interesit publik.

‘’I akuzuari E.Sh., në cilësinë e drejtorit të administratës – mbikëqyrës i menaxherit të projektit, ka ndikuar që operatorët ekonomik gjatë fazës së ofertimit të manipulojnë me çmime për njësi’’ , thuhet sipas KPRK-së.

Kryetari i partisë Guxo në Prizren, Haxhi Avdyli, ka reaguar pas ngritjes së aktakuzës ndaj shtatë zyrtarëve të Komunës së Prizrenit për keqpërdorim të detyrës zyrtare dhe mashtrim në prokurim publik.

Përmes një postimi në rrjetin social Facebook, Avdyli ka shprehur qëndrimin e tij kritik ndaj qeverisjes aktuale komunale, duke e cilësuar si të dështuar dhe të zhytur në afera korruptive.

“Ekipi i Shaqir Totajt, që zhvatjen e buxhetit e ka kthyer në specialitet, qenkan më në fund akuzuar për keqpërdorim të qindra mijëra eurove të qytetarëve”, shkruan ai.

Ai shton se mandati i kësaj qeverisjeje ka qenë i karakterizuar nga “manipulim me tenderë, punësime të paligjshme, nepotizëm, falsifikim, politizim dhe mashtrime”, duke e cilësuar pushtetin aktual si një “qeverisje në ikje”.

Avdyli kritikoi gjithashtu mungesën e transparencës dhe përmendi mospërfilljen e nevojave reale të qytetarëve.

“Atmosfera e zymtë politike dhe jo bashkëpunuese është bërë letërnjoftimi politik i kryetarit në ikje të Prizrenit”.

Avdyli shprehet se qyteti i prizrenit duhet të çlirohet nga ndikimi i grupeve të interesit, të cilat, sipas tij, shpesh janë të lidhura me krimin: “Prizreni duhet t’u kthehet qytetarëve të tij”./PrizrenPress.com/

Në ambientet e Qendrës Kryesore të Mjekësisë Familjare (QKMF) “Nexhip Berisha” në Prizren, u mbajt sot një mbledhje komemorative në nderim të dr. Kujtim Bakiqit, i cili u nda nga jeta mëngjesin e 17 majit, në moshën 62-vjeçare.

Në këtë ceremoni të përmbushur me ndjenja të thella respekti e dhimbjeje, u përkujtua jeta dhe kontributi i çmuar i dr. Bakiqit, i cili për dekada të tëra shërbeu me përkushtim në QKMF Prizren, duke dhënë një kontribut të jashtëzakonshëm në kujdesin parësor shëndetësor.

I pranishëm në këtë mbledhje ishte edhe kryetari i Komunës së Prizrenit, Shaqir Totaj, i shoqëruar nga bashkëpunëtorët e tij.

Në fjalën e rastit, Totaj e cilësoi dr. Kujtimin si një profesionist të rrallë, të cilit pacientët i ishin gjithmonë prioritet.

“Kjo është një humbje e madhe për të gjithë ne që e njohëm dhe bashkëpunuam me të”,  u shpreh ai.

Ushtruesi i detyrës së drejtorit të QKMF-së, Fadil Bajraktari, e përshkroi të ndjerin si një figurë shembullore për përkushtim, profesionalizëm dhe humanitet.

Ai theksoi se dr. Bakiqi gjithmonë tregoi kujdes të veçantë për secilin pacient që trajtonte.

Ndërsa kolegu i tij, Eshref Kryeziu, foli nën emocionet e humbjes për një mik dhe bashkëpunëtor të dashur, duke e përshkruar atë si një profesionist të përkushtuar dhe njeri të jashtëzakonshëm.

Nga familja, me një fjalim prekës, foli vajza e dr. Kujtim Bakiqit, Melisa, e cila mes lotësh kujtoi babanë si një prind shembullor, humanist dhe njeri me zemër të madhe.

Dr. Kujtim Bakiqi ka qenë për shumë vite shef i Shërbimit të Urgjencës në QKMF Prizren, ku ka lënë gjurmë të pashlyeshme në fushën e mjekësisë dhe shëndetësisë publike.

Në shenjë nderimi të veçantë, Shërbimi i Urgjencës në Prizren e përcolli kortezhin funeral drejt varrezave të qytetit me autombulanca, duke e përshëndetur për herë të fundit kolegun dhe mikun e tyre./TV Prizreni