Kryetari i Komunës së Dragashit, Bexhet Xheladini, ka reaguar ndaj deklaratës së Degës së PDK-së në këtë komunë, e cila kritikoi organizimin e aktiviteteve me rastin e Ditës së Çlirimit, duke e quajtur atë të politizuar dhe të zbrazët nga përfshirja qytetare.

Në një reagim të gjatë dhe të detajuar, Xheladini thekson se më 12 qershor është shënuar me dinjitet Dita e Çlirimit të Komunës dhe se përpjekjet për ta politizuar këtë datë janë “të pabaza dhe të paarsyeshme”.

“Nuk do të lejojmë që përpjekjet për politizimin dhe shtrembërimin e kuptimit të Ditës së Çlirimit të Komunës sonë të mbeten pa përgjigje”, shkruan Xheladini.

Kliko linkun:https://www.facebook.com/PrizrenPress/videos/1746425489334258

“Kjo është një datë me rëndësi të veçantë për të gjithë qytetarët tanë, pa dallime partiake apo etnike”.

Sipas tij,  aktivitetet janë zhvilluar me përfshirje të gjerë qytetare dhe me pjesëmarrjen e shumë segmenteve të shoqërisë.

Ndër aktivitetet e përmendura nga ai ishin: gara sportive të organizuara nga gratë asambliste, një ceremoni për pensionistët, një seancë solemne në Kuvendin Komunal me praninë e OVL-së, përfaqësuesve të FSK-së, Policisë, bashkësisë islame, shoqërisë civile dhe qytetarëve, si dhe koncerte, gara me kuaj, dhe një sërë ngjarjesh të tjera që do të pasojnë.

Xheladini vuri në dukje edhe faktin se këtë vit është realizuar edhe binjakëzimi i Komunës së Dragashit me Komunën e Mavrovës dhe Rostushës nga Maqedonia e Veriut, duke i dhënë festës një karakter ndërkombëtar.

“Në asnjë aktivitet nuk është artikuluar mesazh politik apo promovim partiak. Fjalimet e mia dhe të Kryesueses së Kuvendit janë publikuar dhe qytetarët kanë pasur mundësi t’i ndjekin. Çdo qëndrim ka qenë i fokusuar në nderimin e historisë dhe vlerave të përbashkëta”.

Xheladini kritikoi qeverisjen e kaluar të PDK-së për, siç tha, mungesë aktivitetesh gjithëpërfshirëse gjatë 14 viteve në pushtet, duke theksuar se asnjëherë nuk ishin organizuar ngjarje për gratë, pensionistët, apo ngjarje ndërkombëtare.

“Qytetarët meritojnë një qasje të ndershme, përbashkuese dhe transparente ndaj festave tona të përbashkëta – jo përpjekje për përfitime politike në kurriz të vlerave që na bashkojnë”.

Ky reagim vjen pas akuzave të PDK-së se manifestimi i Ditës së Çlirimit ishte politizuar dhe i bojkotuar në mënyrë të qëllimshme nga qytetarët si formë pakënaqësie ndaj udhëheqjes komunale./PrizrenPress.com/

Marketing

Dega e Partisë Demokratike të Kosovës (PDK) në Dragash ka reaguar ashpër pas manifestimit të organizuar nga Komuna për Ditën e Çlirimit, duke vënë në dukje mungesën e theksuar të pjesëmarrjes së qytetarëve në këtë ngjarje dhe duke e konsideruar atë si një “reagim të heshtur” ndaj, siç thuhet në reagim, politizimit të aktiviteteve publike nga udhëheqja komunale.

Kliko Video https://www.facebook.com/PrizrenPress/videos/1728704571859439

Sipas PDK-së, bojkotimi i manifestimit nga qytetarët nuk përbën mungesë respekti ndaj vlerave kombëtare, por është një sinjal i qartë pakënaqësie ndaj mënyrës se si po organizohen këto ngjarje.

“Kjo mos-pjesëmarrje nuk është rastësore dhe as mungesë respekti ndaj datës apo vlerave kombëtare, por një reagim i heshtur qytetar ndaj mënyrës së papërgjegjshme dhe të politizuar me të cilën po organizohen aktivitetet zyrtare nga udhëheqja komunale”, thuhet në reagimin e PDK-së.

Kliko linkun:https://www.facebook.com/PrizrenPress/videos/1746425489334258

Duke e vlerësuar gjithnjë lart pjesëmarrjen dhe angazhimin e qytetarëve në të kaluarën në ngjarje shtetërore dhe kombëtare, PDK thekson se kjo situatë është e pashembullt dhe duhet të merret seriozisht nga udhëheqja komunale.

“Qytetarët e Dragashit kanë qenë gjithmonë të pranishëm me dinjitet, përkushtim dhe respekt. Mungesa e tyre tani duhet të kuptohet si një mesazh serioz dhe i qëllimshëm – një sinjal se qytetarët nuk ndihen më të përfaqësuar”.

Partia opozitare në Dragash ka kritikuar edhe sjelljen e kryetarit të Komunës, duke e akuzuar për shndërrimin e aktiviteteve përkujtimore në “sfilata politike” dhe promovim të figurave partiake.

“Kryetari ka sjellë figura partiake, si nga brenda ashtu edhe nga jashtë komunës, duke e kthyer çdo ngjarje publike në një sfilatë politike. Dhe është e natyrshme që qytetarët të reagojnë – sepse këto aktivitete nuk janë pronë e partive apo individëve”.

PDK gjithashtu shprehu keqardhje për situatën para mysafirëve nga komunat fqinje të Maqedonisë së Veriut, duke e quajtur ngjarjen “të zbrazët nga përfshirja qytetare dhe e ngarkuar me mesazhe partiake”.

PDK-ja kërkon nga udhëheqja komunale që të ndalë politizimin e manifestimeve dhe të punojë për bashkimin e qytetarëve përreth vlerave të përbashkëta.

“Kërkojmë nga udhëheqja komunale që të reflektojë dhe të ndalojë menjëherë politizimin e ngjarjeve publike, për hir të unitetit qytetar dhe respektimit të vlerave që na bashkojnë”./PrizrenPress.com/

Ka nisur ndërtimi i impiantit për përpunimin e ujërave të zeza në fshatin Breznë të Dragashit, një projekt që pritet të sjellë përmirësime të ndjeshme në kushte higjieno-sanitare dhe në mbrojtjen e mjedisit.

Kliko linkun:https://www.facebook.com/PrizrenPress/videos/1746425489334258

Kryetari i Komunës së Dragashit, Bexhet Xheladini, tha se ky projekt është pjesë e premtimeve të qeverisjes lokale dhe dëshmi e angazhimit për zhvillimin e qëndrueshëm të zonave rurale.

“Hap pas hapi, premtimet e qeverisjes sonë po bëhen realitet,” u shpreh Xheladini. “Ky investim i rëndësishëm jo vetëm që do të përmirësojë ndjeshëm kushtet higjeno-sanitare të banorëve, por gjithashtu do të ketë ndikim pozitiv në mbrojtjen e mjedisit, shëndetin publik dhe zhvillimin e turizmit”, shkruan Xheladini.

Ai tregon se projekti është pjesë e një strategjie më të gjerë për përmirësimin e jetës së përditshme të qytetarëve në zonat rurale.

“Realizimi i këtij projekti është dëshmi e angazhimit tonë për zhvillimin e qëndrueshëm dhe për të ofruar kushte më të mira për komunitetin tonë”.

Ndërtimi i impiantit pritet të përfundojë në muajt në vijim dhe të vihet në funksion menjëherë pas përfundimit të testimeve teknike./PrizrenPress.com/

Kompania Rajonale e Ujësjellësit “Hidroregjioni Jugor” njofton se në fshatin Zhur të Prizrenit po vazhdojnë punimet për përfundimin e projektit të rehabilitimit të plotë të ujësjellësit, të realizuara nga operatori ekonomik. Për shkak të rritjes së konsumit në ditët e fundit dhe furnizimit të pjesshëm nga rrjeti ekzistues, në disa lagje po paraqiten probleme në furnizimin me ujë, raporton PrizrenPress.

Menaxhmenti i kompanisë zhvilloi sot një vizitë në Zhur, ku dëgjoi shqetësimet e banorëve lidhur me situatën.

“Duke marrë parasysh rritjen e konsumit në ditët e fundit, por edhe faktin se furnizimi ende është duke vazhduar (pjesërisht) edhe nga rrjeti ekzistues, po paraqiten probleme të furnizimit në disa lagje të fshatit”, thekson në njoftim KRU “Hidroregjioni Jugor”.

Menaxhmenti po ashtu shprehet se KRU do të marrë të gjitha masat e mundshme për të siguruar furnizim të qëndrueshëm për të gjithë konsumatorët.

Sipas kompanisë, për të garantuar furnizim sa më të drejtë dhe të qëndrueshëm, do të aplikohen reduktime të përkohshme të ujit në këto lagje: “Omaj”, “Ademaj” dhe “Kurtaj”, nga ora 19:00 deri në ora 11:00./PrizrenPress.com

Marketing