Drejtoria e Emergjencave dhe Sigurisë në Komunën e Prizrenit ka filluar zbatimin e projektit për vendosjen dhe funksionalizimin e kamerave vëzhguese të sigurisë në qytet.
Gjatë fazës së parë janë instaluar 12 kamera në Qendrën historike të qytetit.
Drejtoresha e DES-it, Ramize Sinanaj-Shala ka theksuar se jetësimi i këtij projekti ka nisur pas një dekade të tentativave të pasuksesshme. Sipas saj, vendosja e kamerave vëzhguese të sigurisë ka për qëllim sigurinë publike përkatësisht mbrojtjen e jetës dhe pasurisë së qytetarëve.
“Pas vendosjes së kamerave në zonën historike, në vitin 2025, do të vazhdojë vendosja e kamerave edhe në pjesët tjera, si në hyrje e dalje të qytetit, rrugët kryesore, rreth rrotullimet, udhëkryqet, shkollat dhe në vendet më të frekuentuara nga qytetarët”, ka thënë ajo, raporton Telegrafi.
Sipas saj edhe aspektet e privatësisë do të respektohen.
“Kamerat do të monitorojnë vetëm hapësirat publike dhe nuk e cenojnë të drejtën e asnjë individi”, ka thënë zyrtarja e lartë komunale.
Komandanti i Stacionit Policor në Prizren, Nexhdet Mrasori ka theksuar se realizimi i këtij projekti është i rëndësishëm për Policinë, por edhe për qytetarët, ngase do të ndikoj në parandalimin e veprave penale dhe të kundërvajtjeve të ndryshme.
“Qendra e monitorimit në Drejtorinë rajonale të Policisë do të mundësojë edhe monitorimin 24 orësh me praninë e zyrtarëve policorë përgjegjës”, ka thënë Mrasori.
Komuna e Prizrenit ka nënshkruar kontratën për vendosjen dhe mirëmbajtjen e kamerave vëzhguese të sigurisë në territorin e kësaj komune, ne vlerë prej 930 mijë eurosh, raporton Telegrafi.
Rrugët e sheshet kryesore të Prizrenit patën filluar të vëzhgohen nga kamerat e sigurisë në vitin 2012, kur Drejtoria e Emergjencës pati investuar 200 mijë euro për instalimin e 70 kamerave në pikat kryesore. Por vite më pas, në bazë të raportimit të organeve ligj zbatuese rezultonte se pjesa më e madhe e tyre nuk funksiononin. /Telegrafi/
